الذكور لما تحب.. نمر بري مشي 807 ميل عشان يتجوز 

05/12/2019

الإنسان في العصور القديمة كان بيهاجر ويتنقل من بلد للتانية عشان يدور على العشب والماء، يعني كان بيمشي مسافات طويلة ويطلع عينة عشان يشبع رغباته اللي مايقدرش يعيش من غيرها، نفس الكلام برضه بيطبقه أي كائن حي إنه ممكن يقطع مسافات خرافية عشان يلبي رغباته ويتبسط.

وده اللي عمله النمر اللي عنده سنتين ونص ويعتبر شاب يعني، وهو مشي تقريبا أطول مسيرة واللي هي عبارة عن 807 ميل (1300) كيلومتر عشان يدور على نص التاني ويمارس الجنس، مشي المسافة دي على مرتين أول مرة كانت حوالى 403.5 ميل وتاني مرة زيهم بالظبط برضه 403.5 عشان يوصل لنصه التاني.

الرحلة بتاعت النمر دي كانت في الهند وخدت منه مشي حوالى 5 شهور، النمر مشي من محمية الحياة البرية في ولاية ماهاراشترا الغربية اللي كانت تعتبر بيته أصلا في شهر يونيو 2019 وكان مربوط فيه جهاز راديو واتمشي تقريبا قد ولايتين في الهند، وكانوا في الأول فكرينه بيدور على أكل أو فريسة يلتهمها أو أرض تانية يعيش فيها.

وبالرغم من إن النمر عبر مسافات كتير كان فيهم مزارع وطرق سريعة ومياه، إلا إنه ماتعملش مع بشر غير مرة واحدة كانوا بيستكشفوا المكان اللي كان بيستريح فيه زي ما قال تقرير BBC واتصاب بجرح عن طريق الخطأ.

النمر ماكنش ماشي في رحلته دي بطريقة خطية (على خط واحد) في مدة الـ 5 شهور، في الخمس شهور دول النمر اتفسح في  ولاية ماهاراشترا والولايات المجاورة، وتيلانجانا، وفي الفترة الأخيرة تم رصده في محمية تانية للحياة البرية في ولاية ماهاراشترا، ووفقا للـ Gps والقمر الصناعي اللي بيتتبعه اتسجل وجوده في أكتر من 5 ألاف مكان في آخر 9 شهور.

وقال  الدكتور بلال حبيب، عالم الأحياء الأول في معهد الحياة البرية في الهند ، لبي بي سي إن النمر ممكن بيدور على أرض وأكل ورفيقة ومعظم الأماكن المحتملة اللي ممكن يسكنها النمور في الهند حاليا مليانة والنمور محتاجة تدور وتكتشف أكتر، والناس أصلا ماتعرفش إن النمر ده بيتنقل.

وعشان النمر يفضل عايش في أمان أثناء رحلته كان بيحاول يبقى مستخبي في النار وبيصطاد بالليل فريسته وده اللي نتج عنه قتل كتير من الخنازير ومواشي برية عشان كان بيدور على أكل، لكن مكنش في مشكلة ليه مع البشر خلال رحلته إلا في حالة واحدة بس، والمسؤولين عن النمر بيشكوا إنهم ممكن يقبضوا على النمر وينقلوه لأقرب غابة عشان يتجنبوا أي حوادث غير مرغوب فيها، ولإن الرادار اللي متتبعه ممكن يفصل بعد ما تم استنزاف بطاريته بنسبة 80%.

ووفقا للخبراء فعدد النمور في الهند بيزيد على عكس باقي الحيوانات،  لكن للأسف مواطنهم والأماكن اللي بيعيشوا فيها هو اللي بيقل وأكلهم كمان بيقل. 

Comments: