١١ سبب يخلوا فيلم "الناظر" من كلاسيكيات السينما المصرية

05/12/2019

من حوالى 19 سنة تقريبا، اتعرض فيلم "الناظر" في السينمات المصرية واللي كان في البداية اسمه (الناظر صلاح الدين) وبعد كده الاسم اتعدل عشان الرقابة لإنه متاخد من شخصية ليها وزنها في التاريخ الإسلامي، ومن فيلم اتعمل عنه، ومن الواضح جدا في الاسم قبل تعديله إن دي كانت بداية مدرسة الألش عند المصريين، وده لو دل على حاجة هيدل على الإبداع بتاع كاتب الفيلم ومخرج الفيلم برضه وهو نفس الشخص "شريف عرفة".

على الرغم من إن الفيلم كان أبطاله وقتها مش بنفس شهرة دلوقتي إلا إنهم عملوا كوميديا وإيفيهات عاشت لمدة 19 سنة من غير ما الناس تزهق منها بالعكس دي اتطورت مع تطور الافيهات وتحولها لميم كمان، بس فيه أسباب كتير تخلي فيلم الناظر لازم يعيش سنين كمان قدام:

1- علاء ولي الدين من أحلى الفنانين اللي قدموا كوميديا، وده عشان طريقة تمثيلة اللي بتوصل للناس بسهولة وطريقته البسيطة في الكوميديا 

2- علاء ولي الدين قدم 6 شخصيات مختلفة من الفيلم من أول عصر الفراعنة وعصر المماليك وثورة 19 وقام بدور الأب والأم والابن (اللي هو بطل الحدوتة)

3- دور جواهر بالرغم من إنه كوميدي ولسه مستخدم لحد دلوقتي لكن برضه كان بيظهر صفات شخصية الأم ودوافعها في حب ابنها وإنها تحافظ عليه وفي نفس الوقت تساعده يتخلص من عقدته الأبوية

4- الفيلم نفسه بيحكي وبيتكلم عن الفساد اللي بيحصل في المدارس والمؤسسات التعليمية اللي كلنا اتقرصنا منها، ومن ضمن تفاصيل الفيلم إنه بيتكلم عن الفساد المادي اللي بيحصل في المدارس 

5- أحمد حلمي في الفيلم عمل دور الشخص غير المكترث المتبلد اللي محدش كان مهتم بيه ولا بوجوده باحترافية خلته علامة مميزة 

6- ظهر في الفيلم محمد سعد بشخصية اللمبي لأول مرة واللي من نجاحها بس عمل منها أجزاء أفلام لوحدها

7- الفيلم وضح كمان مشاكل المدرسين والحاجات اللي بيعانوا "مدرس تاريخ وفرنساوي لحد ما يجيبوا مدرس فرنساوي"

8- لحد دلوقتي من 19 سنة مفيش فيلم اتعمل زيه، ولو اتفرجت على الفيلم في كل مرة جيه قدامك صدفة مش هتزهق منه

9- ظهر في الفيلم شخصيات دورها ماكنش رئيسي لكنهم أثروا في كوميديا الفيلم كأنهم أبطال بالظبط زي ميس انشراح ومرات اللمبي وزكريا الدرديري 

10- بالرغم من إن هشام سليم كان طالع في الفيلم بدور الشخص العاقل وصوت الضمير وهو اللي صلح المدرسة ووقف جنب صلاح إلا إنه لما كان بيقول إيفيهات قدر يضحكنا ويخليها تعلق معانا زي "يا جماعة الشيء ده كل ما بيفتح بوقه بينرفزني" 

11- فيلم "الناظر" بقى من كلاسيكيات السينما المصرية خصوصا اللي اتعملت في أول الألفية وعمل طفرة جديدة في نوع الكوميديا اللي ظهرت بعد كده على شاشة السينما

Comments: