٦ أسباب نفسية ممكن تخلي شخص يقع في حبك

05/12/2019

فيه ناس بتفضل طول عمرها تدور على حاجة واحدة بس عشان هي بالنسبة لهم زي الهوا والمياه عشان يعيشوا، بيدوروا على المشاعر الحلوة اللي بتندرج كلها تحت مسمى الحب أي نوع من أنواع الحب في حياتهم، عشان الحب هو السعادة والحياة والضحك والحزن والالتزام والضغط والراحة والصداقة والأمومة والاحتواء والأمان، بس للأسف مش سهل إنك تلاقيه بسهولة كده.

اللي بنستغرب له كلنا هو إزاي بيقدر نفس الشخصين يستلطفوا بعض وبعدين هما الاتنين يحسوا بمشاعر تجاه بعض ويحبوا بعض! الطب النفسي خد سنين عشان يوصلوا لإجابة مقنعة عن الاستفسار ده ولقوا إن فيه أسباب فعلا بتخلي الشخصين يحبوا بعض وهما زي:

1- لو كنتوا شبه بعض جدا:

بالرغم إن طول عمرنا بنسمع عن إن الناس المختلفة بتتشد لبعضها عشان يكملوا بعض والكلام ده إلا إن اتضح إن التشابه ده بيعمل جاذبية بين الناس، وفيه دراسة اتعملت في 2007 بتقول إن الأشخاص اللي شبه بعض بيلاقوا نقط بتساعدهم على فهم بعض أسرع وده بيخلق بينهم روابط أقوى بشكل أسرع بدل ما ياخدوا وقت على ما يفهموا اختلافات بعض ويتأقلموا عليها.

2- بيبصوا في عين بعض فترات طويلة:

في دراسة في جامعة "ماس" لقت إن الناس اللي ممكن يبقوا بيشتغلوا مع بعض أو بيشوفوا بعض لفترات طويلة وبيبصوا في عين بعض لمدة دقايق له تأثير، لإن التواصل بالنظر اللي بيكون لفترة له قدرة على إنه يطور المشاعر وخصوصا مشاعر الحب، وفيه دراسة اتعملت في 2014 أثبتت برضه إن لما تبص لوش شخص بتحبه لفترة طويلة بينقل مشاعر الحب.

3- لما تهتم بالبيئة:

من الحاجات الغريبة جدا إنك لما تهتم بالبيئة اللي حواليك ده ممكن يساعد إن فيه شخص هيشوفك شخص جدير إنك تبقى شريكه، فيه دراسة اتعملت في 2016 إن الأشخاص اللي بيشتروا حاجات صديقة للبيئة ممكن يفكر فيهم ناس إنهم شركاء لحياتهم طول العمر.

4- يبقى عندك كلب:

إن يبقى عندك كلب ده بيزود فرصة إن حد يحبك فعلا، فيه دراسة اتعملت سنة 2008 عن طريق راجل حاول ياخد رقم كذا بنت وهو معاه كلب ومن غير الكلب، ولقى إن لما يبقى معاه كلب في حاجة فيها تفاعل اجتماعي زي ده بيساعده ياخد أرقامهم أكتر من غير الكلب، ونفس النتايج دي اتعملت بس على دراسة للستات ولقوا إن الرجالة بتصنف الستات اللي معاها كلاب إنهم بيوصفوهم كشركاء لحياتهم على المدى الطويل أكتر.

5- لو كنت بتستخدم إيماءات بإيدك كتير:

فيه دراسة اتعملت سنة 2016 على عدد كبير من الستات والرجالة على الخروجات بتاعت "الديتس" والنتايج قالت إن الأشخاص اللي كانوا بيقولوا إنهم عايزين يشوفوا الشخص اللي نزل معاهم الديت تاني هما اللي بيبقى شريكهم في الديت بيحرك إيده ودراعة كتير.

6- ريحته بتبقى حلوة:

فيه دراسة اتعملت في جامعة جنوب كاليفورنيا كانت بتوضح إن الستات في فترة الإباضة كانوا بيفضلوا ريحة التي شيرتات بتاعت الرجالة اللي فيها نسبة عالية من هرمون التستوستيرون وده بيتطابق مع غرايز تانية ليها علاقة بالهرمونات.

وفيه عالم نفس تاني في جامعة "سانت أندروز" اسمه " ديفيد بيريت" لقى إن الشخص بينجذب للشخص اللي عنده نفس لون شعر وعين اللي عنده أهله من الجنس التاني، وبرضه نفس الفئة العمرية اللي شافوا فيها أهلهم وقت الولادة، فلقوا إن الأشخاص اللي اتولدوا وأهلهم أكبر من 30 سنة بينجذبوا أقل للشباب وبينجذبوا أكتر للملامح الأكبر.

Comments: