٥ أسباب علمية بتفسر ليه ممكن تضحك على شخص لما بيقع؟

09/12/2019

المتعارف عليه في البشرية كلها هي إنك لما تبقى زعلان أو متضايق أو غضبان ممكن تعيط ولما تبقى سعيد وفرحان بتضحك، بس فيه حاجات بتحصل خارقة للقوانين دي زي لما حد بيقع قدامك بتلاقي نفسك تلقائي بتضحك عليه، وده اللي بيتم استخدامه في برامج المقالب خصوصا الأمريكية اللي بتبقى قايمه على إن فيه أشخاص بيعملوا حركات معينة وبيقعوا وصوت الجمهور بيضحك وإنت كمان هتضحك على اللي بيقع، وبالرغم إن كل شخص عنده حس فكاهي مختلف، ليه كلنا بنضحك على الشخص اللي بيقع.

موقع medical daily قال شوية أسباب زي:

1- إطار اللعب:

دكتور "ويليام فراي" دكتور علم النفس ومؤسس علم الضحك في جامعة ستانفورد قال إن إطار اللعب بيحط مواقف وأحداث واقعية في سياق مش جد عشان يطلع رد فعل غير عادي، وده بيفسر ليه بالرغم من إن كده من المضحك إنك تشوف شخص بيقع من الدور السادس فمابتضحكش، لكن لما بتشوف شخص بيقع في الشارع بتضحك عادي، الموقف بيبقى مختلف خالص عن إن شخص بيبقى بيص من الشباك وشوفته وقع ومات، غير لما تبقى بتتفرج على شخص بيتمشى عادي واتكعبل ووقع فهيكون موقف محرج.

2- عدم تناسق الأحداث:

إنك تضحك بسبب وقوع شخص ما ده بيكون لإنه حدث غير متوقع وبيبقى بسبب عدم تناسق الأحداث، زي مثلا كده لما هتضحك على مهرج عشان لابس جزمة كبيرة أو عشان حد مناخيره كبيره، وده بيفسر إننا بنضحك على الحاجات الغير منطقية والغامضة والغير متناسقة وغير مناسبة كمان.

3- المحافظة على قواعد المجتمع:

الفيلسوف هنري بيرجسون قال إن المجتمع بيدرب الناس على الضحك على المواقف الغريبة والسلوكيات المختلفة وكل مجتمع له الإرشادات بتاعته، في الوقت اللي بيقع فيه حد ده بيبقى فيه احتمال كبير جدا إنهم يكونوا خارج السياق اللي الناس قاعدة فيه ومافيش تناغم في الحدث اللي عملوه مع الأحداث الموجودة، الضحك بيبقى عبارة عن تذكرة للي حوالينا بقواعد المجتمع لإن مفيش حد بيحب حد يضحك عليه، لكن الضحك بيخلينا نبان كأننا طبيعين.

4- الخلايا العصبية العاكسة في الدماغ:

الرد بالضحك لما بنشوف حد بيضحك ممكن يبقى رد فعل طبيعي في عقولنا، بعض علماء الأعصاب اقترحوا إن فيه خلايا عصبيةعاكسة بتنطلق داخل الدماغ وبتعكس عمل شخص ما بيعمل حاجة معينة، وهي اللي بتخلينا نحس كأن إحنا اللي وقعنا أو إن ده موقف سخيف، دماغنا بتشتغل على إعادة نشاط دماغ الشخص اللي وقع فعلا ودماغنا بتستفزنا للضحك.

5- المسافة العقلية:

كل ما زادت المسافة النفسية عن المواقف العلنية كل ما زاد احتمال الضحك بصوت عالي، في 2010 اتعملت دراسة قال فيها عالم النفس بيتر ماكجرو من جامعة كولورادو إنك لما تشوف شخص بيصاب بالأذي ممكن تضحك خصوصا لو ماحستش بالتعاطف مع الضحية، فيه شخص في برنامج زي "Jackass " اتعمل بيبقى فيها شخص بتصاب بالأذى دايما ده كان كوميدي جدا بالنسبة للناس لإنهم ماكنوش بيتعاطفوا مع الخدع ولا مع الشخص، في حين إنك لو تعرف الضحية هيصعب عليك عشان المصايب دي مش مضحكة خالص، وهنا القرب ده بيزود إحساس عدم الأمان والتهديد.

عموما كل دي نظريات بتفسر ليه ممكن تضحك لما شخص بيقع ونتمني نبقى ريحنا ضميرك اللي ممكن يبقى حس بالذنب مرة تجاه حد ضحكت عليه لما وقع.

Comments: