في اليوم العالمي للكتاب.. بنرشحلكم 7 من سلاسل الروايات المميزة

النهاردة اليوم العالمي للكتاب.. وعشان هى ذكرى مهمة والعالم كله بيحتفل فيها بالثروة الأدبية المختلفة.. وكل واحد بيفتكر فيها كتب مهمة بيحبها مايقدرش ينساها.. عشان كده  في الموضوع ده هنرشحلك مجموعة من سلاسل الكتب المميزة في مصر والعالم..

1- سلسلة ماوراء الطبيعة:

لمحبي الفانتازيا والخيال وأدب الرعب هتستمتعوا بسلسلة ماوراء الطبيعة للكاتب الراحل “أحمد خالد توفيق” اللي بتحكي عن دكتور “رفعت إسماعيل” بيمر بمجموعة من الأحداث الخارقة للطبيعة وبيحاول يعرف كل مرة إيه السر وراها؟


2-سلسلة رجل المستحيل:

وهي لمحبي القصص البوليسية من تأليف الكاتب الكبير “نبيل فاروق”  بتحكي قصص ومغامرات عن ظابط مخابرات مصري اسمه “أدهم صبري” ولقبه رجل المستحيل.. بيواجه كل المؤامرات اللي بيتعرضلها بسبب قدراته المميزة وبيحاول ينتصر على الأعداء في كل جزء.

3-سلسلة المغامرون الخمسة:

وهي سلسة مغامرات بوليسية من تأليف الكاتب “محمود سالم” بتحكي عن خمس أطفال هما (لوزة -نوسة-تختخ-عاطف-محب) وكلبهم زنجر بيحاولوا يحلوا ألغاز كل جريمة رغم صغر سنهم وكل مرة بيواجهوا خطر جديد لكن بيقدروا يتغلبوا عليه بذكائهم.

4- سلسلة هاري بوتر:

هي سلسلة روايات للكاتبة البريطانية ” جوان كاثلين رولينغ” مكونة من 7 كتب.. بتحكي عن هاري بوتر اللي بيكتشف إن عنده قدرات سحرية مميزة وحكاياته في مدرسة السحر والعقبات اللي بيحاول يحلها ويستخدم سحره فيها عشان يحمي نفسه وصحابه.

5-سلسلة العراب:

هي سلسلة روايات من نوع الجريمة والإثارة مكونة من 4 كتب.. للكاتب الأمريكي” ماريو بوزو” بتحكي عن زعيم مافيا وعيلته وإزاي بيتعاملوا مع أعدائهم خلال الأحداث اللي بتحصل معاهم .


6-صراع العروش (أغنية الجليد والنار):

هي سلسلة روايات لمحبي الخيال والأساطير للمؤلف الأمريكي”جورج مارتن” وبتدور أحداثها في قارتين خياليتين اسمهم “ويتروس” و “ايسوس” وبتحكي عن الصراع بين العائلات على الحكم وكل عيلة عندها قصص وأسرار بنعرفها.

7-سلسلة سيد الخواتم:

هي مجموعة روايات خيالية وفانتازيا من كتابة “جون رونالد” وبتدور أحداثها في مكان خيالي اسمه “الأرض الوسطى” ومكون من شعوب مختلفة، بشر وسحراء.. بنشوف خلال الأحداث السعي وراء البحث عن الخاتم اللي صنعه سيد الظلام عشان يدمروه.

وعلى فكرة احتمال تكون شوفت حاجة من الروايات دي لأن أغلبهم أتحول لمسلسلات وأفلام مشهورة.. بس دايما الروايات والكتب بيكون فيها تفاصيل أكتر بكتير مابتتعرضش على الشاشات.