٩ حلقات لـ"فريندز" احتفلوا فيهم برأس السنة والكريسماس

26/12/2019

قليل جدا لما تلاقي حد مابيحبش مسلسل "فريندز" في العالم كله، وقليل جدا لو حد عرف هو بيحب مين أكتر من شخصيات المسلسل لإنهم كلهم أحلى من بعض فيه، ومهما فضلنا نكتب في أسباب بتخلي الناس تحب المسلسل ده مش هنخلص لإن كل واحد عنده سبب يخصه، ويمكن للأسباب المختلفة اللي عند كل شخص دي فالمسلسل بيبقى من أحلى الحاجات اللي ممكن تتجمع عليها إنت وصحابك أو عيلتك ليلة رأس السنة وتتفرجوا عليها، والجو هيبقى أحلى أكتر لو كانت الحلقات اللي بتخص رأس السنة والكريسماس.

خلينا نفكرك بالـ 9 حلقات اللي بيتكلموا عن الكريسماس ورأس السنة وممكن تتفرج عليهم في لمة ليلة رأس السنة مع عيلتك أو ياريت مع صحابك:

1- الموسم الأول الحلقة العاشرة:

الحلقة دي اللي بيظهر فيها لأول مرة القرد بيتاع "روس" اللي هو "مارسيل"، ومونيكا وريتشل هما اللي بيعملوا حفلة رأس السنة وكلهم اتفقوا إنهم مش هيبقى عندهم أي "ديتس" في ليلة رأس السنة دي، وكلهم سمعوا الكلام وعملوا كده ما عدا روس اللي جاب القرد.

2- الموسم التاني الحلقة التاسعة:

في الحلقة دي بيتجمعوا كلهم عشان يحتفلوا بليلة رأس السنة بس جهاز التدفية بيعطل وبيسخن الجو جدا وكلهم بينهاروا من الحرارة، وروس وريتشال بيتخانقوا عشان قايمة الإيجابيات والسلبيات اللي ريتشال بتكتبها عن روس، وفيبي بتقرر إنها هتزور أبوها الحقيقي وبتاخد معاها جوي وتشاندلر عشان يدعموها، وهما بيدوا بعض هدايا الكريسماس جوي وتشاندلر كان عندهم هدايا مختلفة لإن دي اللي اشتروها وهما راجعين مع فيبي زي الواقي الذكري وأغطية التواليت وكانت أسوأ هدايا لرأس السنة.

3- الموسم التالت الحلقة العاشرة:

في الحلقة دي تشاندلر كان بيحاول يقنع ريتشال إنها تسيب الشغل بتاعها في كافية "سنترال بارك"، وفيبي قررت تبيع أشجار الكريسماس ولما فشلت إنها تبيعهم قرر جوي ومونيكا إنهم يشتروا منها الشجر كله عشان يخلوها مبسوطة.

4- الموسم الرابع الحلقة العاشرة:

الحلقة دي اللي كان فيها ريتشال بتقول إنها مابتحبش تبقى لوحدها في الوقت ده من السنة، وتشاندلر بيظبط لها ديت مع حد ماتعرفهوش، وروس كان بدأ "يديت" مع بنتين في نفس الوقت وهما الأتنين كل واحدة فيهم قاعدة في مكان بعيد عن التانية وبيحاول يتنقل بين المكانين، وفيبي كعادتها كانت بتحاول تألف أغنية جديدة عن الوقت ده لحد ما هتقول الأغنية الكوميدية بتاعتها في الآخر.

5- الموسم الخامس الحلقة العاشرة:

الحلقة دي اللي ظهر فيها داني جار ريتشال واكتشفت فيها إن علاقته بأخته كانت مريبة جدا، وروس كان عايش مع جوي وتشاندلر في بيتهم وكان بيساعد جوي يكتب سيناريو فيلم بتاعه بس اكتشف في الآخر إن جوي بيكتب عن نفسه أصلا،وفيبي في الحلقة دي كانت بتحاول تجمع التبرعات للفقرا عشان الكريسماس.

6- الموسم السادس الحلقة الـ 11:

دي الحلقة اللي روس ومونيكا كانوا بيرقصوا في مع بعض ورقصوا رقصتهم الغريبة عشان الكاميرا تيجي عليهم وتصورهم، وفيبي وريتشال وتشاندلر اتعاونوا مع بعض عشان يعرفوا مونيكا مخبية هدايا الكريسماس فين.

7- الموسم السابع الحلقة التاسعة والعاشرة:

في الحلقة التاسعة دي مونيكا بدأت تعمل حاجات حلوة عشان الكريسماس لجيرانها اللي بقوا متحمسين جدا ليها، وروس جاب لفيبى أول عجلة في حياتها، وفي الحلقة العاشرة كان روس بيحاول يتنكر عشان ابنه "بن" وعايز يلبس سانتا كلوز لكن لبس هدوم " أرماديلو" ولبس تشاندلر سانتا كلوز وجوي لبس سوبر مان.

8- الموسم التامن الحلقة الـ11:

صاحبة روس اللي كان اسمها "منى" كانت عايزة تبعت لأهلها صورة ليهم لكن روسحس إن الوقت بدري جدا على ده فكعادته اتلخبطت واداها مفتاح الشقة.

9- الموسم التاسع الحلقة العاشرة:

تشاندلر في الحلقة دي كانت بيقضي الكريسماس في "تولسا" وكانت بيفتقد مونيكا وادي صحابة في الشغل هدية الكريسماس بتاعتهم وكانت تبرعات بأسماءهم، وكانت بقيت الحلقة فيها حكايات عن حلقات الكريسماس اللي فاتت.

10- في الموسم العاشر للأسف ماكنش فيه حلقة عن الكريسماس أو رأس السنة وخلص مسلسل "فريندز" في الوقت ده.

Comments: