قصة بهاء سلطان ونصر محروس: سبع سنين من الخلافات حرمت الجمهور من صوته

02/01/2020

احتفل برنامج "صاحبة السعادة" اللي بتقدمه الفنانة إسعاد يونس براس السنة الجديدة واستضافوا النجم بهاء سلطان اللي كان اختفى من فترة طويلة ومابقاش ينزل أي أغاني جديدة بسبب خلافاته مع المنتج نصر محروس، ورغم كده حافظت أغانيه القديمة على انتشار كبير حققته من وقت نزولها، ويمكن زاد انتشارها آخر سنتين.

ووجهت إسعاد يونس في الحلقة طلب لنصر محروس إنه يحل خلافاته مع الفنان بهاء سلطان، وبعدها أعلن "محروس" على حساباته الرسمية استجابته لطلب صاحبة السعادة، وإنهم هيتوصلوا لحل قريب.

وكانت بداية مشكلة بهاء سلطان مع نصر محروس تقريبا من سنة 2014 من أول ما طرح في الأسواق أغنيته السينجل "أسيبك"، وحققت نجاح كبير وبعدها طلب بهاء سلطان من نصر محروس إنه يبدأ في إجراءات طرح ألبومه الجديد لإنه كان غايب عن جمهوره لمدة سنتين، ووعده إن الألبوم هينزل في شهر مارس سنة 2014، لكن بعد كده قاله إن الألبوم هيتأخر بسبب الأحداث السياسية في مصر والوطن العربي كله، واتفقوا إن الألبوم هينزل في نص السنة.

وحسب تقارير صحفية، حمدي بدر، مدير أعماله اللي كانت معين من شركة نصر محروس "فري ميوزيك" قال له إن الشركة مش هتقدر تطرح الألبوم في الوقت المحدد لإنه بيستخرج تصاريح قناة تلفزيونية جديدة ومركز في الوقت ده في القناة ومابيفكرش يطرح أي أغاني، ووقتها اتضايق لإنه حس إن اللي المفروض يبلغه بالخبر ده هو نصر محروس نفسه مش مدير أعماله، وفضلوا مايتكلموش لحد ما اتقابلوا في فرح أخوه أمير محروس وقاله إن هينزل الألبوم في آخر 2014.

بهاء سلطان نفسه، قال في فيديو مصور مع جريدة "اليوم السابع" سنة 2016 إن أزمته مع نصر محروس سببها عدم رغبته في إنه يمضي عقد احتكار، وإن الشركة خيرته بين إما عقد الاحتكار أو إنه مايغنيش، ده غير مطالبته بدفع مقابل مادي عن السنين اللي اشتغلها مع "فري ميوزيك".

وقال بهاء إنه هيحاول يقدم للمحكمة التماس يسمح له إنه يشتغل لحد ما القضية تخلص وتتحل، لكن ده ماحصلش، لكن الأمل رجع تاني لجهور بهاء سلطان إنه يرجع يقدم أغاني جديدة تاني، بعد استجابة نصر محروس للي قالته إسعاد يونس في برنامجها.

Comments: