تحذيرات جديدة من خطورة "تيك توك": الجيش الأمريكي حظره على الجنود

05/01/2020

في شهر نوفمبر 2019 عملت الحكومة الأمريكية تحقيق لشركة "ByteDance" المالكة لتطبيق TikTok، وكان التحقيق بخصوص إذا كانت شركة "Musical.ly" بتنتهك الأمن القومي أو لا.

وزي ما قالت وكالة "رويترز" فشركة "ByteDance" كانت استحوذت على شركة "Musical.ly" قبل سنتين، وكانت قيمة الصفقة دي حوالي مليار دولار، وبكده بقى التطبيق جزء من تطبيق TikTok ، وقالت التقارير اللي نشرتها رويترز إن الحكومة الأمريكية كانت عايزة تتأكد إن التطبيق مابيراقبش أي محتوى حساس له علاقة بالسياسة وإزاي بيتم تخزين بيانات المستخدمين للولايات المتحدة.

وعلقت شركة "ByteDance" وقالت إن أولويتها هى كسب ثقة المستخدمين وإن الجهات التنظيمية الأمريكية هتتعاون مع الكونجرس واللجان المعنية، لكن دي ماكنتش أول مرة يتم انتقاد تطبيق TikTok.

ونشر النهاردة موقع CNN تقرير إن الجيش الأمريكي حظر على جنوده استخدام تطبيق TikTok ووصفه إنك ممكن يشكل تهديد أمني، لإن TikTok هو تطبيق مملوك للصين وشاكين إذا كان بيمثل تهديد على الأمن القومي ولا لا وإن التطبيق ممكن يتم استخدامه لجمع البيانات الشخصية للمواطنين الأمريكان.

وقال المتحدث باسم الجيش الأمريكي "روبن أوتشوا" لشبكة CNN إن كان فيه رسالة اتبعتت للمواطنين يوم 16 ديسمبر وهي رسالة توعية إلكترونية وبتفيد إن ممكن تطبيق TikTok بيشكل مخاطر أمنية محتملة على مستخدميها، وطلبت إنهم ياخدوا الاجراءات اللازمة عشان يحموا بياناتهم، وطلبت كمان منهم إنهم ياخدوا بالهم من التطبيقات اللي بينزلوا على موبايلاتهم ويقروا شروط الاستخدام كويس قبل ما يحملوا تطبيقات على موبايلاتهم، وطلبت كمان منهم يسمحوا تطبيق TikTok فورا ويلغوا تثبيت البيانات الشخصية.

وقالت رويترز كمان إن القوات البحرية خدت قرار مشابه للقرار ده في نص ديسمبر اللي فات، وقال للجنود في القوات البحرية إن اللي مش هيحذف تطبيق TikTok من موبايله فورا هيترفد من القوات البحرية.

و TikTok مش شركة التكنولوجيا العملاقة الصينية الوحيدة اللي بتثير شك القوات الأمريكية ده فيه كمان شركة "Huawei" ، لكن "Huawei" مش زي TikTok اللي بيشد كل المراهقين إنهم يعملوا أكونت عليه ويتشهروا من خلاله.

Comments: