تفاصيل مصرع والد الفنان إيهاب توفيق في حريق بمنزله الخاص

09/01/2020

النهاردة الصبح الخميس 9 يناير 2020 حصلت حريقة في فيلا والد الفنان إيهاب توفيق اللي في الحي الأول في مدينة نصر، وبعد ما وضح للناس حدوث حريقة في الفيلا كلموا المطافي عشان يتم إخماد النار، لكن بعد وصول المطافي وإخماد النار دخلوا الفيلا وقدروا ينقذوا 5 أشخاص كانوا قاعدين في الفيلا، بس للأسف ماقدروش يلحقوا والد الفنان إيهاب توفيق.

واتضح بعد كده إن سبب الوفاة هو حدوث ماس كهربائي في الدفاية الكهربائية وحصل بسببه حريقة، لكن سبب وفاة أحمد توفيق والد الفنان إيهاب توفيق هو الإختناق اللي أدى لوفاته.

وصرح الفنان إيهاب توفيق لبعض المواقع الإلكترونية إن والده كان قاعد في الدور الأول وحاولوا العاملين في الفيلا إنهم يخرجوه بس للأسف هو راجل كبير في السن ومايقدرش يتحرك بشكل سريع والنار كانت قوية وسريعة جدا.

وتم نقله للمستشفى لتشريح الجثمان، ونيابة مدينة نصر انتدبت الأدلة الجنائية كمان عشان يحددوا سبب الوفاة ويحددوا سبب اندلاع الحريق في الفيلا عشان يتأكدوا هل فيه شبهة جنائية ولا لا.

وكملت المطافي إخماد الحريق اللي كان في الفيلا لمدة ساعتين تقريبا عشان يمنعوا وصول الحريق لأي مباني جنب الفيلا تاني.

ونعت نقابة المهن الموسيقية وفاة والد الفنان إيهاب توفيق، وقدمت للفنان خالص التعازي، ووجه مجلس النقابة برئاسة الفنان هاني شاكر دعم إيهاب توفيق بعد انتشار خبر الحادث.

وده فيديو كان ظهر فيه أحمد توفيق وهو بيغني لإيهاب توفيق:

Comments: