٦ علامات للابتزاز العاطفي: دليل إن العلاقة غير صحية

09/01/2020

لما تبقى بتحب شخص بتبقى مش عارف تفرق إذا كانت علاقتكوا ببعض صحية ولا مش صحية، وللأسف كمان بيبقى صعب التمييز بين الأفعال الرومانسية والأفعال غير الصحية في العلاقات زي الغيرة مثلا، وده اللي بيخلي تمييز الابتزاز العاطفي صعب.

فيه دكتورة اسمها "Connie Omari" صاحبة عيادة "Tech Talk Therapy" قالت لموقع "Bustle" إن الابتزاز العاطفي واحد من أكتر الطرق اللي بيتحكم فيها الشريك في شريكه التاني، وده بيحصل لما الشريك المسيطر يتعامل فيها مع شريكة التاني ويلعب على عواطفه عشان يوصل للي هو عايزة، وممكن يتم بطرق مختلفة، فمثلا لو كان فيه خناقة بينك إنت وشريكك ووصلت بيك في الآخر إنك تقوله "أنا أسف عشان أنا شخص سيء" فده كده ابتزاز عاطفي.

ومن أشهر الطرق في الابتزاز العاطفي اللي بتبان إنها أفعال رومانسية مع إنها أفعال ممكن تسيء للشريك التاني هي:

1- بيبقى عايز يعرف كل حاجة عنك على طول:

أكيد شعور حلو جدا إن حد يبقى مهتم بيك وتفاصيل يومك وحياتك وعايز يعرف كل حاجة عنك، بس لو وصل بيك الموضوع لدرجة إنك حاسس إن الموضوع مش مريح، فمثلا لو طلبوا منك يعرفوا حاجات تخص فلوسك أو مادياتك عموما في مرحلة أول العلاقة فده شيء غير مريح بس ممكن شخص تاني يفتكر إنها حاجة حلوة إن حد يهتم بمادياته واستقراره، فلو ماكنتش مستريح للأسئلة الكتير دي فممكن تحط حدود ولو هو بيحبك أكيد هيحترم الحدود دي.

2- بيشاورلك دايما على عيوبك:

لما يكون شريكك شخص صريح ده شيء حلو بس يكون صريح من غير ما يجرحك، "Samantha Morrison" خبيرة الصحة قالت إن من أول علامات الابتزاز العاطفي هي إن يبقى فيه حد بيقولك دايما على عيوبك، لكن هما ممكن يبقوا بيعملوا كده بطرق أحسن ومش ضارة بس الحقيقة بيثير الشكوك والخوف عندك، وبالتالي أصلا لما حد يفضل يقولك على عيب فيك كتير-حتى لو مش فيك- هتصدقه، وبيكون أثره على ضحية الابتزاز إنه بيكمل في العلاقة دي عشان بيخاف محدش يقبله تاني، ولما الموضوع يوصل للدرجة دي بيبقى الأحسن إنك تنهي العلاقة دي.

3- بيقرر يعاقبك بعد الخناقات اللي بينكوا:

لو بعد ما بتتخانقوا شريكك بيقرر يختفي ويبعد عنك من غير ما يقولك هو فين، فهو كده في بيبتزك عاطفيا لإنه بيعاقبك عن طريق إنه بيبقى قاصد يخليك تقلق عليه، إنك تطلب مساحة دي حاجة من حقك وممكن تعملها في أي وقت لكن الشخص اللي بيختفي عشان يخلي شريكه يقلق هو كده بيعاقبه وبيبتزه عاطفيا، فلو حصل معاك ده لأول مرة واتضايقت منه لازم تتكلم مع شريكك وتقوله إنك اتضايقت من اللي حصل وهو لو فهم ده وماكنش يقصد الابتزاز العاطفي فالمرة اللي بعدها هيقولك هو فين حتى لو في نص الخناقة.

4- يبقى بيختبرك:

لو إنت في علاقة صحية فلازم يكون فيه توازن على الأقل بين الطرفين، بمعني إنك مش لازم تعمل إنت كل حاجة لوحدك عشان العلاقة تستمر وتتقدم، فمثلا لو أهل شريكك مش موافقين عليك إلا بعد ما تغير بعض الصفات فيك فده ابتزاز عاطفي.

5- بيرجعلك في كل حاجة في حياتك:

هتحب جدا الإحساس بتاع إنك أهم حاجة في حياة شخص ما، لكن خلي بالك لو الشخص ده بدأ يلمح لك إنك الشخص الوحيد في حياته فمثلا يبدأ يقولك إنك أهم شخص في حياته، وإن مالهوش غيرك، وماعنديش حد غيرك اعتمد عليه أو أخد رأيك، خد وقفة هنا عشان الشخص ده هيخليك مسؤول عن سعادته أو مسؤول عن كل مشاكله.

6- عايز يبقى كل حاجة في حياتك:

الشخص المبتز هيقولك إنه كل حاجة في حياتك، وهيعمل كل حاجة يقدر يعملها عشان يثبتلك ده وعشان تحتاجه وتلجأ له فيه وإن ممكن تلجأ له أي وقت، وممكن دي تبقى طريقة مستخبية شوية عشان يعزلك عن أهلك وصحابك، وطبعا لما مايكنش عندك أي شخص تلجأ له هو هيقدر يتحكم فيك ويسيطر عليك.

عموما لو لقيت إن شخص بيبتزك عاطفيا فمن المهم إنك تواجه وتقوله ده، استخدم الجمل اللي بتكلم فيها عنك وعن شعورك، بس بلاش ترمي اللوم عليه أو على أي شخص تاني، وخليك فاكر برضه إن الابتزاز العاطفي هو علامة إن الشخص ده مانضجش عاطفيا، وخليك عارف إن العلاقات اللي فيها ابتزاز عاطفي هي علاقات غير صحية وبتأذيك بشكل ما ومن المهم جدا إنك تنهيها.

Comments: