"أديداس" هتحول بلاستيك المحيطات لأحذية وملابس رياضية

14/01/2020

شركة "أديداس" المتخصصة في الملابس والأدوات الرياضية نشرت فيديو بتقول فيه إنهم كل سنة بيصنعوا حوالي 400 مليون زوج من الأحذية، وطبعا عملية الصناعة دي بتحتاج لموارد كتير لكن تصنيع المواد الجديدة باستمرار ده مش أحسن حاجة بالنسبة للبيئة عشان كده شركة "أديداس" بتعيد تدوير الموارد في صناعة الأحذية الخاصة بيها.

خبراء البيئة بيتوقعوا إن في خلال 30 سنة هيكون فيه نسبة أكبر من البلاستيك في المحيطات يمكن لدرجة إنه هيبقى أكتر من السمك اللي في المحيطات أصلا، وكل التلوث اللي في البحار والمحيطات واللي على الشواطئ كمان ده مضر بصحة البشر قبل الحيوانات والأسماك، عشان كده "أديداس" بتحاول توقف إن البلاستيك ده يوصل للمحيطات أصلا، ومن سنة 2015 وشركة "أديداس" بتشارك مع منظمة البيئة " Parley for the Oceans" عشان يحولوا البلاستيك لملابس رياضية وبالفعل حققوا تقدم كبير وهايل في الموضوع ده.

وفي سنة 2019 أداديس بتتوقع صنع 11 مليون زوج من الأحذية اللي معمولة من موارد معاد تدويرها من البلاستيك اللي في المحيطات، وده أكتر من ضعف اللي تم صنعه في سنة 2018 ، وبتقول شركة "أديداس" إنهم منعوا حوالي 2810 طن من البلاستيك من الوصول للمحيطات.

وده عن طريق الشواطئ، بتبدأ الأول شركة " Parley for the Oceans" بلم البلاستيك من المناطق الساحلية زي جزر المالديف مثلا وبعدها بيتك فرز النفايات وبعدها بيبعتوا البلاستيك المستعاد لمصانع شركة "أديداس" لمعالجة البلاستيك، وبتستخدم شركة "أديداس" الأزايز البلاستيك اللي بتحتوي على "إيثيلين تيريفثاليت " أو الـ"PET" ولو كان فيه حاجات شركة "أديداس" ماتقدرش تستفاد بيها أو تعيد تصنيعها زي الطواقي والخواتم بيبعتوها لمرافق إعادة التدوير.

ومصنع النفايات بتعامل مع البلاستيك عن طريق إنه بيفرمها وبعد كده يغسلها ويجففها وبتبقى قطع بلاستيك رقيقة، وبعدها بيتم تسخين قطع البلاستيك ده وتجفيفها وتبريدها وتقطعها لكور صمغية صغيرة، في العادي إن البولستر بيقي مصنوع من البترول لكن "أديداس" بيدوبوا الكور دي عشان يصنعوا خيوط وبعدها يتم صناعتها على هيئة هدوم من البولستر، وبتستخدم "أديداس" المواد المصنوعة من بلاستيك المحيطات في صناعة الأجزاء العلوية من القمصان والجزم والهدوم عموما، وكل منتج بتم تصنيعه من 75% من بلاستيك المحيطات وهما برضه محافظين على معايير الأداء والراحة لجزم "أديداس"، ده غير إن البوليستر المعاد تدويره بيستهلك كميات أقل من المياه والكيماويات وبيساعد طبعا في الحفاظ على البيئة من تلوث البلاستيك.

وهدف "أديداس" اللي جاي هو إن في سنة 2024 يبقوا بيستخدموا البوليستر المعاد تدويره بدل البوليستر الحقيقي، لإن أكتر من 40% من هدوم "أديداس" مصنوعة من البوليستر المعاد تدويره، لكن الحلول دي برضه مش هتخلينا نتخلص من مشكلة تلوث المحيطات بالبلاستيك خالص لإن البوليستر لما بتغسل بينتج ألياف دقيقة جدا وبينتهي مصيرها إنها تبقى في المحيطات برضه، عشان كده "أديداس" بتصنح عملاءها إنهم يغسلوا الهدوم بمياه باردة ويغسلوها أقل وفي كل مرة يغسلوا فيها يملوا الغسالة.

ودي بالنسبة لـ "أديداس" مجرد أول خطوة في الحفاظ على البيئة لإنهم بيحاولوا يصنعوا جزمة تبقى قابلة لإعادة التدوير بنسبة 100%، وهيبقى اسمه "Futurecraft Loop" ومن المتوقع إنها هتبقى متاحة في سنة 2021.

Comments: