يوتيوبر مشهورة بفيديوهات الماكياج أعلنت إنها متحولة جنسيا

14/01/2020

مفيش أي شخص مؤثر أو "انفلونسر" الناس بتقي عارفة كل حاجة عنه زي ما هو واضح على السوشيال ميديا، ومش معنى إن فيه تفاصيل كتير من حياتهم ظاهرة على السوشيال ميديا إننا نعرف عنهم كل حاجة، وده اللي حصل مع اليوتيوبر " Nikkie de Jager" اللي ليها شعبية وجمهور كبير طلعت في فيديو وقالت لجمهورها إنها "transgender " أو ست متحولة/ عابرة جنسياً.

اليوتيوبر الهولندية " Nikkie de Jager" شاركت مع جمهورها تفاصيل قصة تحولها جنسيا مع أكتر من 12 مليون شخص عاملينلها "subscriber" وقالت في الفيديو تفاصيل كتير وشكرت ناس كتير منهم أمها اللي كانت أكبر شخص بيأيدها وبيدعمها وقالت لها إنها بتحبها لإنها كانت معاها دايما ومن أول يوم، وقالت إنها بدأت في قناة المكياج لإنها كانت بتكمل عبورها الجنسي.

اتشهرت اليوتيوبر الهولندية " Nikkie de Jager" على الإنترنت  عن طريق مقاطع الفيديو الخاصة بالمكياج اللي كان اسمها "power of makeup" أو قوة المكياج مع مشاهير زي " Jessie J " و" Lady Gaga" واتعاونت مع علامات تجارية زي "Too Faced" عشان تعلن عن منتجاتهم.

وقالت كمان إنها اتعرضت للابتزاز عن طريق أشخاص حاولوا يسربوا قصتها للأخبار، وقالت إنها كانت عارفة أو حاسه إنها بنت من ساعة ما كانت طفلة وإنها سابت شعرها يطول وبدأت الناس تتعرف عليها إنها بنت.

وقالت إن فيه أطفال معاها في المدرسة قدروا يقبلوها زي ما هي وفيه أطفال طبعا ماقبلوهاش، ودي كانت حاجة كويسة" لكنها ممتنة دايما للمدرسين بتوع مدرستها اللي دعموا رحلتها ودعموها، وصرحت كمان إنها بدأت تاخد هرمونات من سن 14 سنة وخدت ""growth stoppers" عشان تمنعها من إنها تبقى أطول، واتحولت جنسياً بشكل كامل لما بقى عندها 19 سنة بعد ما بدأت فيديوهاتها على اليوتيوب.

وقالت إنها شاركت خطيبها "ديلان" بقصة تحولها الجنسي وإن هما الأتنين كانوا بتعاملوا مع الوضع ده على انفراد، وحافظوا الأتنين على علاقتهم الخاصة بعيد عن وسائل التواصل الاجتماعي، وقالت "أنا هو أنا، أنا Nikkie، ومفيش حاجة اتغيرت بخصوص ده" وأخر حاجة هتبقى عايزاها في حياتها إن جمهورها مايبقاش واثق فيها، أو إنها يشفوها بطريقة مختلفة أو نظرتهم ليها تختلف، أو يحسوا إنها اتغيرت".

 

Comments: