عبثيات: 10 وجهات سياحية تقدر تزورهم في 2020

14/01/2020

كل سنة بيبقى عندك خطط إن حالتك المادية هتتصلح وتعرف تلف العالم أو تسافر مرة أو اتنين على الأقل وحتى لو مش العالم يبقى تلف مصر وتروح حتت حلوة وروشة وتتصور زي "الإنفلونسرز" وتنزل الصور على إنستجرام وتعيش بقى، بس بترجع في آخر السنة تلاقي إن مكانش معاك فلوس تروح المنوفية حتى.

فلو فاتح الموضوع ده وفاكر إننا هنقولك إزاي تسافر في وجهات سياحية جوا  وبرا مصر بأقل التكاليف، لا إحنا عارفين اللي فيها وعارفين إنك كحيان وهنقولك وجهات سياحية في القاهرة الكبرى وضواحيها أو في حدود بيتك لإن دي التكلفة اللي هتقدر توفرها:

1- حديقة الميرلاند في أنحاء مصر الجديدة ممكن تروح تزورها بـ 30 جنيه في أي وقت في اليوم وتمارس شوية أنشطة في نطاق المكان زي ركوب الطفطف أو سماع الأغاني واللعب مع أحباب الله.

2- القناطر الخيرية ودي فسحة شم النسيم بس هتبقى زحمة شوية وفيها أجواء عائلية وأطفال صغيرة بس لو مابتحبش الزحمة ممكن تروح في أي وقت وهتلاقي ميكروباصات من رمسيس وأتوبيسات من ميدان التحرير.

3- اكتشف السطوح بتاع بيتكوا اللي عمرك ما طلعته هتلاقي مناظر طبيعية خلابة بتطل على التكدس السكاني والتصميم العمراني الرائع .

4- جمع صحابك واطلعوا سوا حديقة حيوانات الجيزة بـ 5 جنية في الأيام العادية ولو معاكوا فلوس ممكن تروحوا في الفاضى يوم التلات بـ 65 جنيه وفي نفس الرحلة تقدروا تاخدوا الأتوبيس النهري.

5- رحلة استكشافية استقصائية هايلة لمعرفة باسورد أكونت نتفلكس بتاع صاحبك 

6- طبعا إحنا عارفين إنك زورت الأزهر بارك قبل كده بس خلي بالك المكان ده هتلاقي فيه الاحتواء فلازم تزروه تاني كل سنة عشان بيجلبك الحظ وهتدفع 5 جنيه وفي العطلات والأعياد الرسمية 7 جنية. 

Comments: