صور براد بيت وجينيفر أنيستون في حفل SAG زودت شائعات رجوعهم لبعض

20/01/2020

الحد 19 يناير أقيم حفل توزيع جوايز "Screen Actors Guild Awards" 2020 أو "SAG Awards" في "لوس أنجلوس" ووضحت الصور اللي انتشرت من حفلة توزيع الجوايز صور لمقابلة جينيفر أنستون وبراد بيت واللي خلت ناس كتير شكت في إنهم ممكن يبقوا رجعوا لبعض.

"براد" فاز بجايزة عن دوره في فيلم "Once Upon a Time in Hollywood" وفازت جينيفر أنستون بجايزة عن دروها في مسلسل " Morning show". 

في الكواليس، المصورين رصدوا "براد" في صور وفيديوهات وهو بيتفرج على جينيفر أنستون، وده كان بعد ما استلم الجايزة بتاعته لكن ساب كل اللي وراه واتفرج عليها وهو مبتسم بشكل لطيف.

ده غير الصور اللي ظهروا فيها بيتكلموا مع بعض، كان واضح إنهم مبسوطين وكانوا على وشك إنهم يحضنوا بعض، وفي صورة تانية كانوا ظاهرين و"براد" ماسك إيد "جينيفر" وهي بتحاول تبعد عنه، يمكن آه طول السنين اللي فاتوا وهما محافظين على الصداقة اللي بينهم، بس دي كانت أول مرة يبقوا ظاهرين قدام الكاميرات وهما في الحالة دي.

وده كله غير إن براد بيت كان قال لموقع  ET في حفلة الـ"Golden Globes" إنه ماعندوش مشاكل يبقى بيلجأ للإكس بتاعته، وقال كمان إنه ممكن يلجأ لجينيفر لإنها صديقة كويسة.

الجدير بالذكر إن جينفير أنستون وبراد بيت انفصلوا من حوالي 12 سنة، وبعدها اتجوز براد بيت أنجلينا جولي، واتجوزت جينيفر أنستون جوستين ثيرو في 2015، بس بعد كده كل واحد منهم انفصل، وبالرغم من علاقتهم المعقدة إلا إنهم هما الاتنين صرحوا إن بينهم علاقة صداقة، والسنة اللي فاتت في شهر فبراير في حفلة عيد ميلاد جينفير أنستون الـ 50 شافوا برايد بيت وهو خارج من حفلة عيد ميلادها.
 

Comments: