اكتشاف جديد ممكن يساعد على علاج جميع أنواع السرطان

22/01/2020

اكتشف الباحثين في جامعة " كارديف" في بريطانيا نوع جديد من ما يعرف بـ"مستقبلات الخلايا التائية" (TCR) وهو نوع الخلايا اللي بيتعرف على معظم خلايا السرطان البشرية وبيقتلها كلها وبيتجنب الخلايا السليمة.

نتايج المرحلة الأولى اتنشرت الأسبوع ده في مجلة "Nature Immunology"، لسه ماتمش اختبارها على المرضى، لكن فريق البحث قال إن عندهم إمكانيات كبيرة.

الخلايا التائية هي نوع من الخلايا الليمفاوية (كرات الدم البيضا) وبتنمو في الغدد الصعترية أو الزعترية، وبتنشأ أساسا من الخلايا الجذعية الموجودة في النخاع العظمي، وبتساعد في حماية الجسم من العدوى، وبتقدر تفرق بين الخلايا المدمرة والخلايا المغذية، وده اللي بيقضي هلى الخلايا السرطانية.

لسه العلماء شغالين على تحسين النظام ده من خلال علاجات مناعية بما فيهم الـ( CAR-T) وهو علاج متخصص بيستهدف بس أنواع قليلة معينة من السرطان لكنه مابينجحش في علاج الأورام الصعبة.

فاللي بيحصل إن الخلايا التائية، بتفحص خلايا الجسم عشان تدور على الخلايا السرطانية وبتتجاهل الخلايا السليمة اللي بتحتوي على بروتينات طبيعية، وبيتعرف النظام كمان على أجزاء صغيرة موجودة على سطح مجموعة واسعة من الخلايا السرطانية والخلايا العادية، لكنه قادر يميز بين الخلايا السرطانية والخلايا السليمة وبيقتل السرطانية بس.

وبيتعرف المسح على أجزاء صغيرة من البروتينات الخلوية اسمها "مستضد الكريات البيضاء البشرية" أو (HLA)، وده اللي بيسمح للخلايا التائية القاتلة إنها تشوف اللي بيحصل داخل الخلايا عن طريق مسح سطحها.

وقال الدكتور "أندرو سيويل" وهو الشخص الرئيسي القائم على الدراسة دي في جامعة "كارديف" البريطانية إنه مش من المعتاد إن يبقى فيه TCR على نطاق واسع مع أنواع كتيرة من السرطان وعلى نطاق واسع، وده اللي أثار جدل إن ممكن يبقى فيه علاج شامل للسرطان فيما بعد، وقال إنه بيتمني إن الـ TCR يوفر أسلوب جديد ومختلف عشان يتعملوا مع مجموعة أوسع من السرطانات.

والدراسة دي صنفت الـ TCR إنه حاجة فريدة من نوعها وممكن يتعرف على أنواع كتير من السرطان عن طريق جزء صغير شبه (HLA) لكن اسمه MR1، ولقوا إن الـ TCR ممكن يقتل أورام كتير زي الرئة والجلد والدم والقولون والثدي والعظام والبروستات والمبيض والكلى وعنق الرحم.

وأثبتوا العلماء إن الخلايا التائية عند مرضى سرطان الجلد، مش بس ممكن تدمر الخلايا السرطانية الخاصة بمريض سرطان الجلد لكن ممكن تموت الخلايا السرطانية اللي عند مرضى تانين في نفس المختبر، بغض النظر عن نوع الـ HLA الخاص بالمريض.

وحاليا اللي بيشتغل عليه العلماء إنهم يحددوا الألية الجزئية الدقيقة اللي بيميز بيها الـ TCR الجديد بين الخلايا السليمة والخلايا السرطانية وبيأملوا إنهم يجربوا النهج الجديد ده على المرضى في نهاية السنة دي.

Comments: