١٠ حاجات محرجة إوعى تعملهم لو سافرت بره 

22/01/2020

فيه مثل بالإنجليزي فيما معناه إن لما تبقى في روما اعمل زي ما الرومان بيعملوا، والمثل ده دايما بيثبت صحته مع أي حد بيسافر لبلد تانية فيها ثقافة مختلفة، ولإنك لما بتروح بلد تانية بتبذل مجهود كبير عشان تتعرف على ثقافة وتقاليد أهل البلد، حتى في لغة الإشارة.

لكن فيه حاجات أساسية لازم تعرفها عن كل بلد في حالة إنك ممكن تقابل حد من أهل البلاد دول في بلدك أو لو في خطتك الـ 50 سنة الجاية إنك تسافر البلاد دي، موقع Bright side جمع شوية حاجات بتختلف فيها بلاد معينة لازم تبقى عارفهم عشان رحلتك تعدي بأمان وسلام وهما:

1- البقشيش في اليابان:

طبعا موضوع "التيبس" أو البقشيش مش إلزامي خالص، بس في اليابان في بعض الحالات بيعتبر اليابانيين إن الموضوع ده قلة أدب وإهانة، لإن فيه بعض الفواتير بتقول لعملاء المطاعم إن العاملين بياخدوا مرتباتهم بالكامل عشان كده هما مش محتاجين لبقشيش.

2- تقسيم الفواتير في فرنسا:

في فرنسا مابيحبوش يتكلموا عن الفلوس خالص، عشان كده بيعتبروا تقسيم الفواتير على الناس برضه قلة أدب، لكن طبعا لو كان الحساب اللي ممكن تدفعه كتير ممكن طبعا تقسم الفاتورة.

3- تعمل باي باي لأي حد في اليونان:

بالنسبة لليونانيين الموضوع بيعتبر إهانة أكتر ما هو سلام أو تحية، لإن الموضوع شبه إنك بتقول لحد إنك بترفضه.

4- لمس شخص من الجنس التاني في الهند:

من عادات وتقاليد الهنود، إنهم مش بيسلموا بالإيد على الجنس التاني ولا حتى مسموح بوجود أي تلامس سواء بالإيد أو غيره، وعشان كده بيستخدموا تحية خاصة اسمها namaste

5- تصوير صورة من غير موافقة في الإمارات:

وفقا لقانون الإنترنت في الإمارات تعتبر دي جريمة، فممكن تقعد في السجن حوالي 6 شهور وتدفع غرامة 500 ألف درهم يعني حوالي 136,130 دولار، وخصوصا بقى لو نشرت الصورة دي على السوشيال ميديا.

6- اختراق الطابور في أستراليا:

كلنا عارفين طبعا إنك لما تخترق الطوابير في أي مكان ده دليل على عدم الاحترام، وخصوصا لو كان الموضوع في أستراليا أو إنجلترا، في المواصلات أو في طوابير مراكز التسوق، ولازم دايما تستنى دورك وتحافظ على الأمور وتخليها بسيطة.

7- تمشي في ممرات العجل في هولندا:

ركوب العجل في هولندا هو وسيلة المواصلات الرسمية وغالبا ما بتكون ممرات العجل زحمة، ولما تمشي في ممرات العجل ممكن يبقى فيه مشكلة إن حد يخبطك بالعجلة، فمن الأفضل في هولندا إنك تمشي على الرصيف وتسيب ممرات العجل للعجل.

8- تقول لحد في تركيا "Ok" بس بالغة الإشارة:

نفس الموضوع ده في البرازيل وألمانيا، لإن الحركة دي بالنسبة لهم معناها كأنك بتعمل لهم حركة "الميدل فينجر".

9- الإيماء أو هز الرأس في بلغاريا وألبانيا:

في العالم كله عادة هز الرأس معناها "آه" أو موافق أو نعم، وهز رأسك بالجنب معناها لا أو مش موافق، اللي المفروض تعرفه بقى إن الموضوع عكس كده جدا في بلغاريا.

10- إنك تأكل الطيور في سنغافورة:

في سنغافورة لو حد شافك وإنت بتأكل الطيور أو بتاكل لبان أو بترمي الزبالة في أي حتة ده ممكن يعرضك لغرامة.

Comments: