القضاء الفرنسي هيحول سعد المجرد للمحكمة الجنائية بسبب تهم الاغتصاب 

23/01/2020

في نهاية 2016 بدأت محاكمة الفنان المغربي سعد المجرد بتهمة الاغتصاب بعد ما وجهت له بنت فرنسية التهمة دي، وكان القاضي وقتها خفف التهم الموجة لسعد المجرد لكن بعد نقض محكمة الاستئناف يوم التلات 21 يناير 2020 قرر القاضي إنه هيعيد تصنيف القضية ضمن خانة الاعتداء الجنسي والعنف وهيكون فيه أسباب عشان يزود العقوبة.

 صحيفة "لوباريزيان" الفرنسية قالت على لسان مصدر قضائي إن الفنان سعد المجرد هيتحاكم في المحكمة الجنائية مش محكمة الجنح بتهمة الاغتصاب على خلفية التهم اللي وجهتها له بنت في آخر 2016.

وقال المصدر إن التهم كافية إنها تصنف كاغتصاب، والجريمة بقت في تحت صلاحية المحكمة الجنائية للنظر فيها، لإن زي ما قالت البنت اللي تم الإعتداء عليها "لورا. ب" إنها اتعرضت للاعتداء الجنسي في سن عشرين سنة من الفنان سعد المجرد في شهر أكتوبر 2016.

وبعدها دخل سعد المجرد السجن لحد شهر أبريل 2017، وتم إرغامة إنه يلبس أسورة إلكترونية عشان ترصد تحركاته وإنه يقعد في باريس طول فترة التحقيقات، ووضح محامي الفنان وهو "جان مارك فيديدا" إنه بيحتفظ بحقه في الطعن أمام محكمة التميز.

وفي نفس الملف القضائي تم توجيه تهمة تانية لسعد المجرد في أبريل 2017 إنه اتعدى جنسيا على بنت مغربية فرنسية في 2015 في الدار البيضاء واعتدى عليها بالضرب كمان، وانسحبت المدعية من القضية بعد كده.

ده غير إن في أغسطس 2018 اتوجه للفنان تهمة الاغتصاب من بنت قالت إنه اغتصبها في مدينة سان تروبيه الساحلية جنوب شرق فرنسا، وبالتالي هيخضع المجرد للمحاكمة أمام المحكمة الجنائية.

Comments: