٣ أفلام ملحمية كانت هتنهي Game Of Thrones: هل HBO هتصالح جمهورها؟

23/01/2020

فيه مسلسلات كتير عملت قلق وخلت الناس تتكلم عليها وكان فيها طفرة في الإخراج ويمكن اللي شهر أغلب المسلسلات دي -بخلاف جودة صناعتها- كلام الناس عنها واهتمامهم بيها وبأحداثها ومناقشتهم فيها، زي Breaking Bad مثلا اللي كانت نهايته فيها تفكير كتير وفيها إثارة للمشاهدين.

ومفيش مشاكل أبدا إنك تروح تقول لحد إنك هتتفرج على Breaking Bad  تاني، بس تخيل كده قاعد مع صحابك وقولتلهم انك هتتفرج على Game Of Thrones تاني من أول جزء فيه، يتهيألي إن صحابك وقتها يا هيعتبروا إنك اتجننت أو إن عندك فراغ اليومين دول في حياتك، بسبب نهاية المسلسل اللي تقريبا ماعجبتش حد وسببت إحباط كتير لمحبي المسلسل.

وحقيقي دي حاجة تضايق إن بعد النجاح اللي عمله المسلسل كل ده يبقى صعب حد يتفرج عليه تاني، بس عشان نبقى حقانيين فمسلسل Game Of Thrones من أكتر المسلسلات اللي اتعب فيها عشان تطلع بشكل كويس وأحداث متشابكة جدا وكتابة معقدة فممكن تشغل حلقة منه تتفرج عليه في ليلة ماعندكش فيها أي حاجة أولو حابب تفتكر أحداثه مثلا.

وأكيد مع الوقت نهاية المسلسل وحلقاته الأخيرة المهزوزة اللي أغلب الناس انتقدتها هتفضل ذكرى محفورة في دماغ اللي اتفرج عليه، بسبب إن الحلقات الأولى ومواسم المسلسل الأولى كان الحوار والأحداث فيها في منتهى الذكاء بدرجة تشد أي حد ووصل في الآخر إن المسلسل خيب أمل مشاهدينه.

قال "George R.R. Martin" (مؤلف مسلسل Game Of Thrones)، اتكلم مؤخرا مع المجلة الألمانية "Welt" عن اللي كان المفروض يحصل واللي المفروض مايحصلش في نهاية المسلسل، وكشف في كلامه إنه كان مفروض يكون فيه 3 أجزاء من الأفلام الكبيرة اللي تم التخطيط ليها عشان ينهوا المسلسل بعد الموسم السابع.

فلما اتسأل هل احتمالية تقديم 3 أفلام عشان تنهي المسلسل لسه موجودة ولا لأ، قال إن حاليا شبكة HBO هي المالكة لحقوق المسلسل عشان عشان كده مش هيقدر يقرر، لكن عموما هما درسوا الموضوع ده، والمبدعين اللي ورا العمل ده "David Benioff" و"Dan Weiss" عايزين فعلا ينهوا المسلسل بـ 3 أفلام ملحمية كبيرة، وإن من 4 أو 5 سنين ناقشوا الموضوع بجدية إن المسلسل ينتهي في السينما.

وقال إن وقتها HBO أكدت إنهم مش بينتجوا غير مسلسلات تلفزيونية ومابينتجوش أفلام سينما، وقال كمان إن كل حاجة اتغيرت دلوقتي، إيه هي السينما؟ وإيه هو التلفزيون؟ "يعني Netflix بتصنع سينما ولا بتصنع مسلسلات، كله اختلط ببعض، حاليا إحنا مانعرفش الفرق بين السينما والتلفزيون".

بس مين عارف في السنين اللي جايه فيها إيه، محدش عارف يتوقع حتى ممكن يحصل إيه، لإن قصة وحجم مسلسل Game Of Thrones هيغري أي حد يتفرج عليه خصوصا في المستقبل، اللي ممكن يبقوا مهتمين إن نهاية المسلسل تبقى في 3 أفلام ملحمية، ونتمنى وقتها يكون خلص كتابة المسلسل في الوقت المناسب عشان تطلع النهاية كويسة.

Comments: