دراسة: قلة النوم بتسبب تآكل خلايا المخ

23/01/2020

بالنسبة لبعض الناس الأرق ده عندهم حاجة طبيعية عايشين معاها ونسيوا إزاي يناموا نوم كويس هادي، وده بسبب الإجهاد اللي بنقابله يوميا والأنشطة اللي بنعملها وبسبب إن الحياة بقت سريعة زيادة عن اللزوم، وده بيخلي النوم بالليل شيء صعب وده طبعا بيدمر صحة أي بني آدم.

فيه دراسة اتعملت هتخليك تعيد النظر تاني في أهمية النوم الصحي في حياتك، عشان من وظايف النوم إنه بيساعدك تتخلص من السموم اللي في جسمك وده لإنه بيجدد نظام المناعة والجهاز التنفسي وبيجدد مستويات الطاقة عندنا وده بيسمح لعقلنا بمعالجة المعلومات اللي حصل عليها طول اليوم.

ده غير إن النوم بيظبط ضغط الدم ومعدل ضربات القلب، وبيخص الجسم برضه من السموم الناتجة من الضغط العصبي اللي بيحصلنا طول اليوم، فلما مابيكونش عندنا الوقت الكفاية عشان ننام في اليوم السموم دي بتتحول لاحتياطي طاقة في جسمنا، وعلى المدى القصير التخلص من السموم دي بيبقى مفيد لصحة دماغنا، عشان يعمل العملية اللي قولنا عليها فوق.

وبالتالي على المدى البعيد الناس اللي بتعاني من توقف التنفس وهما نايمين أو بيعانوا من الأرق مخهم هيستخدم كل الطاقة الاحتياطية/ السموم دي وهيأثر على وظايف المخ لدرجة إنه ممكن يتوقف تماما.

وعشان يثبتوا صحة الكلام ده اشتغل فريق من علماء الأعصاب بقيادة "ميشيل بيليسي" من جامعة
"البوليتكنيك" في "ماركي" في إيطاليا على دراسة اتعملت على الفيران، وقسموها لمجموعات مختلفة، وأول مجموعة كان ليها الحرية تنام في أي وقت أثناء اليوم، والمجموعة التانية كانوا بيجبروهم يفضلوا صاحيين ويناموا أقل من 8 ساعات في اليوم، والمجموعة التالتة مانموش لمدة 5 أيام متتالية عشان يقدروا يلاحظوا التغييرات اللي حصلت في دماغهم.

الخلايا النجمية مسؤولة عن وظايف التنضيف الذاتي للمخ ونفس الخلايا دي موجودة عند الفيران، ومن خلال مراقبتها دي قدروا يوصلوا لنتيجة للتجربة بتاعتهم، وفي نهاية التجربة كان مستوى الخلايا النجمية عند الفيران اللي في المجموعة الأولى 6%، والفيران اللي في المجموعة التانية كان مستوى نشاط الخلايا عندهم  8%، والفيران اللي في المجموعة التالتة كان مستوى نشاط الخلايا عندهم 13.5%، وده معناه إن الخلايا بتعمل عملية تنضيف شاملة (أو تآكل) أكتر كل ما قل عدد ساعات النوم.

في الفيران، اللي بيحصل في دماغهم إن بيتم استهلاك المشابك العصبية، وده نفس اللي بيحصل في البشر إن خلايا دماغهم بتاكل نفسها، ولقوا إن عدم النوم لكذا يوم ورا بعض ممكن يؤدي إلى تجاوز الوظايف دي، وده بيخلينا عرضة أكتر للأمراض زي الزهايمر أو التخريف على المدى الطويل.

عشان كده فيه طرق مختلفة كتير هنقولك عليها لو كنت بتعاني من الأرق في بعض الأوقات وهما زي:

1- اعمل "مديتيشن" أو رياضة التأمل 

2- ظبط بيئة أوضتك في الإضاءة والجو أكتر عشان يبقوا مريحين للنوم 

3- مارس أنشطة جسدية زي الرياضة 

4- حدد استخدامك للأجهزة الإلكترونية اللي بتستخدمها 

5- ادخل سريرك كل يوم في نفس الميعاد 

6- قلل من كمية الكافيين اللي بتشربها 

7- عرض نفسك لأشعة الشمس كل يوم لفترة متوسطة 

8- لو فضلت المشكلة زي ما هي من الأحسن تروح لدكتور 

Comments: