كل اللي محتاج تعرفه عن فيروس كورونا الجديد.. النشأة والأعراض والخطورة

25/01/2020

قلق كبير في العالم كله، بعد انتشار سلالة جديدة من فيروس "كورونا" القاتل في الصين، وتسببه في وفاة حوالي 17 شخص وإصابة أكتر من 500، وانتقاله لأكتر من 10 دول تانية، زي اليابان وكوريا الجنوبية وتايلاند وسنغافورة وفيتنام وأمريكا وأستراليا وفرنسا، مع تخوفات من انتشاره في دول عربية عن طريق المسافرين من وإلى الدول الحاضنة للفيروس.

الفيروس انتشر في الصين بشكل سريع جدا، لدرجة إعلان الطوارئ في عدد من المدن الصينية وعزل مدن تانية، بالإضافة للاستعانة بفرق طبية عسكرية من الجيش الصيني لمحاصرة الفيروس في مدينة "ووهان" اللي نشأ فيها.

إيه هو فيروس كورونا الجديد في الصين؟

الفيروس الجديد المكتشف في مدينة ووهان الصينية أواخر ديسمبر 2019، هو سلالة أو تطور جديد في عائلة فيروسات كورونا، وهي فيروسات متلازمة تنفسية حادة جدا وقاتلة بتصيب الجهاز التنفسي وأحيانا الهضمي.

عائلة كورونا مش جديدة، هي مكتشفة من سنة 1960 لكنها سلالاتها تطورت مع الوقت انتشرت بشكل كبير وسببت ذعر عالمي في الـ 15 سنة اللي فاتت واتسببت في مئات الوفيات، وأشهر أعضاء العيلة دي هو فيروس "سارس" اللي قتل 9% من المصابين بيه، أما التطور التاني المشهور لـ"كورونا" فهو فيروس "ميرس" أو كورونا الشرق الأوسط اللي اكتشف في السعودية سنة 2012 وقتل 35% من المرضى اللي أصيبوا بيه، وانتشر في دول الشرق الأوسط زي الإمارات وقطر وإيران وعمان مع تسجيل مصر والجزائر لحالة مرضية واحدة من غير وفيات.

إزاي الفيروس نشأ؟

جميع فيروسات عائلة كورونا حيوانية المنشأ، وهي موجودة في الكلاب والقطط والمواشي والخنازير، والفيروس حيواني الأصل معناه إنه بيصيب الحيوانات في الأساس لكنه عنده القدرة أو العوامل اللي بتساعده على الانتقال للبشر، ورغم إن الحيوانات بتحتضن أعداد كبيرة وأنواع ضخمة جدا من الفيروسات، إلا إنه من المستحيل انتقالها للبشر إلا في حالة ضعف الجهاز المناعي لشخص ما بيكتسب المرض، أو وجود عوامل مساعدة دفعت الفيروس للتطور.

وعموما، انتقال الفيروس من الحيوان للبشر من أخطر أشكال تحور الفيروسات، لأن الجهاز المناعي للإنسان مابيبقاش عارف يتعامل مع الفيروس الجديد لأنه شيء غريب وجديد بالنسبة له، ده غير إن الفيروس بمجرد انتقاله للإنسان بيبقى أشرس وأقوى بكتير وبيطور نفسه عشان يعرف ينمو في البيئة الجديدة.

مجلة علمت الفيروسات رجحت إن الفيروس أصله موجود في الخفافيش، لكن مع تطوير الأبحاث ودراسة خلايا الطاقة في الفيروس قالوا إنه غالبا جاي من تعبان "كرايت" الصيني.

إيه هي أعراضه وطرق الوقاية؟

نظرا لأنه فيروس جديد، فللأسف ملوش لقاح أو أدوية تقدر تقاومه حاليا، لكن النضافة العامة والغسل المتكرر للإيد واستخدام المناديل وعدم الاقتراب من أي حامل للفيروس، ونقله للمستشفى إذا كان في شك في إصابته، لأنه بينتقل عن طريق العطس أو الكحة أو أي احتكاك بالمريض حامل الفيروس.

وأعراض المرض بتشبه إلى حد كبير فيروس الإنفلنزا الموسمية:

- كحة وعطس وضيق تنفس

- آلام في الجسم والعضلات

- التهاب الحلق والحنجرة

- التهاب في الأنف

- ارتفاع درجة الحرارة

- الإسهال

هل "كورونا" تحول لوباء عالمي؟

منظمة الصحة العالمية قالت إن الانتشار السريع والكبير للفيروس في الصين يعني إنه حالة طوارئ صينية لكن لا يعني إنه تحول لوباء عالمي.

Comments: