٩ أسباب تحب عشانهم حسن شاكوش: مجتهد ومتواضع

06/02/2020


نشر النهاردة الصبح إيلون ماسك الرئيس التنفيذي لشركة "سبيس إكس" ترتيب الأغاني العالمية على "الساوند كلاود" وكتب عليها "أسخن 8 أغاني على الساوند كلاود" وكانت الأغنية التانية في السكرينشوت أغنية بنت الجيران لحسن شاكوش.

أغنية بنت الجيران جات في المركز التاني في وسط الأغاني العالمية لإنها اتسمعت 45 مليون مرة وفي آخر أسبوع بس اتسمعت 4.5 مليون مرة، وبالنسبة لنفس الأغنية فهي حققت 63 مليون مشاهدة على اليوتيوب، ده غير إن من فترة نشر حسن شاكوش صورة له على انستجرام عشان يحتفل بدرع يوتيوب الدهبي بعد ما تخطى عدد المشتركين على قناته على اليوتيوب مليون مشترك.

حسن شاكوش بعد وصوله للنجاح اللي هو فيه دلوقتي، خلانا نحس إنه "Good boy"، خلينا نقولك ليه حسن شاكوش هو "Good boy" من تصريحاته:

1- حسن شاكوش كان بيلعب كرة في نادي الإسماعيلي لمدة 4 سنين ولعب في المصرية للإتصالات ولف في الكرة شوية وعشان كده هو غير المطربين الشعبي ومحافظ على جسمه.

2- حسن شاكوش بقاله كتير في مجال الأغاني من وقت أغنية "أشكرك، أوعدك" اللي طلعت في 2013 وكان في بداية الأغنية "خش يا شاكوش يا جامد" ولسه بادئ يتشهر حالياً واتشهر بمجهوده عن طريق آخر أغاني له زي بنت الجيران.

3- قال في تصريح له في برنامج "حديث المساء" على قناة Mbc مصر إنه طول عمره مابيعكسش ومابيعرفش يعاكس، وقال إن لما كان حد من صحابة يعاكس بنت كان وشه بيحمر وكان بيتخض، واللي مايرضهوش على أخواته مايرضهوش على حد.

4- وقال كمان إن لو رأي لجنة نقابة المهن الموسيقية فيه إنه مايصلحش إنه يغني رأيهم فوق دماغه وإنه بيسمع لهم من غير أي مشاكل، من غير ما يتضايق من حد إنه حكم عليه.

5- بيحب صحابه وبيساعدهم إنهم يدخلوا المجال معاه من غير أي حقد منه، هو اللي ساعد عمر كمال صاحبه إنه يغني معاه أغنية بنت الجيران بالرغم إنها مش لونه أو مش من نوع الأغاني اللي بيغنيها.

6- حسن شاكوش شايف إن الجواز عشان يكون ناجح لازم مراته تكون صاحبته، وإن الجواز لو عبارة عن تحكمات زي مفيش خروج من البيت الجواز ده بيفشل.

7- وشايف كمان إن ماينفعش الأب أو الأم يختاروا لولادهم مين اللي هيتجوزه، لإنه مع مبدأ الحب مش مع مبدأ جواز الصالونات.

8- حسن شاكوش من منطقة "بولاق" وده سبب من الأسباب اللي خلته يفتح محل حلاقه عشان يبقى أرخص من المحلات الغالية اللي بتكون في المهندسين اللي بتوصل أسعارها لـ 500 جنيه، وقال للي هيبقوا شغالين في المحل معاه إن لو جالهم حد عايز يحلق وماعهوش فلوس يحلقوله وصرح بده على التلفزيون.

9- حسن شاكوش حقق حلم أبوه اللي كان عايز يشوفه لعيب كره أو مطرب 

Comments: