٨ حاجات حلوة هتفتقدها لو اتجوزت: السهر والتأخير وفلوسك مش هتبقى ليك 

10/02/2020

الجوار مش حاجة حلوة على طول الخط ولا وحشة في المطلق، في أبعاد كتيرة وأوقات حلوة وأوقات صعبة وتحمل مسؤولية، لكن هتفضل فكرة المشاركة هي أكتر حاجة لامعة أو مغرية أو حميمية في مشروع الجواز، وزي أي حاجة في الدنيا، فحتى فكرة المشاركة ليها جانب تاني معتمد على طبيعة الشريكين وعلى تقبلهم لمشاركة 100٪ من تفاصيل حياتهم.. في الموضوع ده هنقولك على 8 حاجات هتحب تعملهم وإنت سنجل وهتفتقدهم لما تتجوز.

١- تخرج وترجع وقت ما إنت عايز

لو إنت سينجل قرار النزول مش بياخد منك أكتر من لحظة، مش محتاج تعرف حد إنك نازل ومش محتاج تستعجل نفسك عشان ترجع ولا تحدد معاد رجوعك، لكن لو مرتبط في شخص تاني مشاعره لازم تحطها في اعتبارك، لأنه هيقلق عليك لو ماعرفش إنت فين أو لو اتأخرت.

٢- تعمل هواياتك اللي شريكك مش بيحبها

مستحيل يكون شريك حياتك بيحب نفس وكل هواياتك بالظبط، هيبقى في دايما حاجات إنت عايز تعملها بس مش هتعرف عشان الطرف التاني ملوش فيها، لكن لو إنت سنجل، مفيش وقت حلو ولا هواية ولا حاجة بتحبها هتوحشك

٣- تنام لوقت متأخر

لو متجوز مش هتعرف تنام -حتى في أيام الأجازات- لحد الساعة ١٢ الضهر براحتك، لازم هتصحى مع أو بعد ما شريكك يصحى بشوية، ولو مش هتحس بالذنب إنك نايم وشريكك بدأ يومه ومستنيك تقعد معاه، فأكيد هتقلق من حركة مراتك/ جوزك في السرير أول ما يصحى

٤- تقضي وقتك كله في الشغل من غير إحساس بالذنب

أول ما تتجوز وقتك مش هيبقى كله لشغلك -لو اتعودت على كده وبتحب شغلك للدرجة دي- دايما هتحس إنك محتاج تتنجز أو تخلص بدري عشان في حد قاعد مستنيك تشوفه أو تشاركه يومك، ولأنه مش هينفع ترجع على وقت النوم على طول

٥- السفر المفاجئ والعشوائي

قبل الجواز ممكن تصحى تلاقي الجو حلو فتقرر تسافر في ساعتها، تكلم صحابك وتجهزوا في ساعة وتسافروا وترجعوا في نفس اليوم، لما تتجوز وتاخد قرار زي ده هتقضي اليوم في الخناق

٦- تتفرج على التلفزيون من غير دوشة

لما تتجوزك هتوحشك الأوقات اللي كنت بتقفل فيها موبايلك ومفيش وراك حاجة ولا حد مستني منك حاجة، وبتفتح فيها فيلم أو مسلسل وتقعد تتفرج عليه من غير دوشة ومن غير تعليقات من حد قاعد جنب، بيسألك أو بيقول رأيه في أحداث الفيلم/ المسلسل

٧- فلوسك لنفسك

مش هتقدر تروح محل وتعجبك حاجة حلوة وغالية جدا في نفس الوقت وتشتريها من غير ما تفكر في شريكك، أو إن كان ممكن تجيبله حاجة بالفلوس دي أو تقسمها عليكم على الأقل، من الآخر مش هتقدر تدلع نفسك 

٨- قراراتك من دماغك

شريكك هيزعل -وحقه يزعل- لو خدت قرار مهم أو حتى تافه في حياتك من غير ما تاخد رأيه، حتى لو القرار ده يخصك لوحدك، عموما من أول ما تتجوز مش هتبقى حر نفسك ١٠٠٪، فكرة إنك عايش مع حد في بيتك واحد وتفاجئه بقرار ما هتعمله أو عملته، مش لطيفة

Comments: