١٢ كدبة كلنا بنكدبهم على السوشيال ميديا

11/02/2020

السوشيال ميديا بالرغم من إنها وسيلة تواصل إجتماعي إلا إنها مؤخرا بقى يتم استخدامها بطريقة تانية وهي إن كل واحد عايز يطلع بشكل معين بيحاول يرسم الصورة اللي عايزها دي على الأكونتس المختلفة بتاعته على السوشيال ميديا، غير إن كل شخص بيحاول يبذل مجهود كبير عشان يبقى الشخص المثالي في العالم الافتراضي حتى لو مش دي صورته الحقيقية.

غالبا كل الناس بتكدب على السوشيال ميديا وكلنا بنستخدم طرق مختلفة عشان نبان أحلى، عشان كده جمعنا أشهر 12 كدبة بيتم استخدامهم دايما باستمرار على السوشيال ميديا وهما:

1- الكدب اللي بيبقى عن إنجازاتك:

كل الناس على السوشيال ميديا بيبقوا عايزين نفسهم يبانوا أشخاص الناس تبقى فخورة بيهم أو تقلدهم، لكن الطريقة دي عموما بتخلي الناس تبصلك على إنك شخص عادي أو بيعرفوا إنك بتبالغ.

2- بتدعى إن وظيفتك أحلى من الحقيقة:

الحاجات اللي بتصورها وبتحطها على السوشيال ميديا في الشغل بتبقى زي الحفلات اللي بتبقى موجودة والهدايا اللي ممكن يبقى مديرك جايبهالك وهكذا، لكن استحالة تنزل صور من نوعية التكييف اللي بايظ وبينقط عليكوا أو الخناقات والميتنجز اللي بيقى كلها تهزيق، ويمكن أكتر حاجة الناس بتشتكي منها هي أشغالهم ففعلا بيبقى مش مبسوطين وهما منزلين الصور الحلوة على السوشيال ميديا.

3- المبالغة في إظهار الانبساط في السفر والرحلات:

الصور اللي بتنزل على السوشيال ميديا بتاعت السفر مابيبانش فيها اللقطات بتاعت وإنت بتجري عشان تلحق الطيارة أو اتوبيس الرحلة، ومابيانش فيها وإنت بتجري بالشنط بتاعتك ومتبهدل فيها، أو الجو كان ساقعة زيادة أو حر بس لما الناس بتسافر بيحطوا أحلى صور لرحلتهم بس.

4- بتكدب بخصوص الأماكن اللي زورتها:

حرفيا الفوتوشوب والبرامج اللي زيه ماخلتش الناس ناقصها حاجة، ممكن يقدروا يخدعوا الناس بصور كأنهم راحوا مكان ما في دولة تانية.

5- بتتدعي إنك في وضع مادي أحسن من اللي إنت فيه:

الناس أغلب الوقت بيحاولوا يظهروا على السوشيال ميديا إنهم أغنى عن طريق لبسهم أو قعدتهم في أماكن غالية أو تصوير فواتير أكل زي اللي ظهرت في رمضان اللي فات وكان فيها بيض مدحرج، وممكن ناس تانية تتصور في عربيات غالية.

6- تظهر بأسلوب حياة صحي:

فيه نوع من الناس بيحبوا يبانوا إنهم "هيلثي" جدا وبيصوروا سلطة بس تقريبا وصور أكل صحي، وطبعا أغلب صورهم في الجيم عشان باقي الصورة بتاعت الحياة الصحية اللي بيرسموها تبان صح، بس الحقيقة إنهم ناس طبيعية بياكلوا زي كل الناس وممكن يعكوا في الأكل ويبطلوا يروحوا الجيم شوية ويكملوا شوية.

7- التظاهر إنك تعرف أكتر من الطبيعي:

ودول نوع الناس اللي بيحبوا يتصوروا في المكتبات مثلا أو يقولوا إنهم قروا المعلومة اللي كاتبينها في كتاب معين، أو بيكتبوا "بوستس" على السوشيال ميديا من نوعية قال الحكيم فلان كذا وقال مش عارفة مين إيه وهكذا يعني.

8- تزييف حقيقة الأبوة أو الأمومة:

ممكن المتابعين بتوعك يفتكروا من صور ولادك اللي بتنزلهم إنهم ملايكة صغيرين مش مجرد أطفال عاديين، وإنك بتموت فيهم بس الحقيقة إن بيطلع عينك معاهم كل يوم وفي تربيتهم وبتزعقلهم وهما كمان بيعملوا فيك بلاوي زرقا ماتتعدش.

9- بتتظاهر إنك دايما سعيد:

أغلب الناس ويمكن كلهم بينزلوا صورهم وهما بيضحكوا أو وهما مبسوطين، وممكن يبقوا قبلها أو بعدها قاعدين قاعدة كلها دموع وعياط وقسى، وطبعا النوع اللي كلنا عارفينه اللي بيحاول يظهر قدام إكساته إنه دايما مبسوط وسعيد في غيابه.

10- بتمثل إنك في علاقة عاطفية سعيدة وصحية:

فيه نوع من العلاقات اللي بتظهر على السوشيال ميديا وخصوصا علاقات الانفلونسرز اللي بتبان كلها كلام حلو وخروجات ومواقف حلوة بتبقى في الأساس معمولة عشان الشير بس، عشان الناس تكتب عليها "Relationship goals" والحقيقة الصادمة إن فيه علاقات كتير منها بتفشل وشوفنا كتير أمثلة منها حصلت فعلا.

11- الكدب بخصوص إنك سينجل:

فيه ناس كتير ممكن تكدب وتقول إنها سينحل في حين إنهم ممكن يبقوا متجوزين ومخلفين أصلا، ودي طبعا لأغراض الشقط أو إنهم يعرفوا ناس أكتر.

12- الكدب بخصوص بشرتك الصافية الجميلة:

في الحقيقة إن كلنا بشرتنا بايظة بطرق مختلفة ومفيش حد فينا بشرته دايما صافية، بس برضه الفوتوشوب والبرامج اللي زيه بتاعت التجميل عشان الإيديت بتخلي الشخص كأنه موديل، في حين إن الموديلز نفسهم في الحقيقة بتبقى بشرتهم مش صافية.
 

Comments: