في ذكرى حنان الطويل: قصة فنانة حبها المجتمع ورفضها

12/02/2020

النهاردة 12 فبراير هو ذكرى ميلاد الفنانة "حنان الطويل" أو "كوريا" أو "ميس انشراح" واللي أدوارها من أكتر الأدوار اللي فرقت مع الناس وأثرت في إنهم يضحكوا وفضلت عايشه معاهم حتى بعد ما ماتت.

اتولدت حنان الطويل في 12 فبراير 1966، وبدأت مشوارها الفني سنة 1999 بعد ما عانت وصارعت في حياتها الشخصية بسبب عدم تقبل المجتمع ليها وانتقاداتهم ليها لما كانت عايشه باسم "طارق" قبل كده، وفضلت محبوسة في جسم وشكل الراجل وحابسه جواها ميولها الأنثوية لحد ما لفت في كذا دولة عربية وقررت إنها هتعمل عملية التحول الجنسي وتبقى عابرة من طارق للنجمة المشهورة حنان الطويل.

وبعد ما عملت عملية التحول الجنسي رجعت لأهلها وتقبلوها زي ما هي واحتضنوها وماتضيقوش من قرارها ويمكن السبب إنهم كانوا معاها في الرحلة الطويلة بتاعتها وهي مش قادرة تعيش في جسم "طارق" اللي كانت عايشه فيه، وبعدها بدأت مشوارها الفني بعد كده عن طريق إنها انضمت لواحدة من فرق الفنون الاستعراضية.

وبعدها انضمت حنان الطويل لنقابة المهن الموسيقية بسبب صوتها اللي كان فيه مساحة كبيرة واللي قدر يأهلها إنها تنجح في كل اختبارات نقابة المهن الموسيقية وبقيت عضو في نقابة المهن الموسيقية وبعدها دخلت مجال التمثيل وبقى ليها أدوار ثانوية مؤثرة في الكوميديا عاشت لحد دلوقتي زي ميس انشراح في الناظر وكوريا في عسكر في المعسكر وعزيزة في 55 إسعاف.

بسبب الضغوط المجتمعية وبسبب عدم تقبل المجتمع الشرقي بصورة كاملة للعابرين الجنسين، بعد ما اتحولت جنسياً بدأت تدخل في صراعات تانية مع المجتمع والناس اللي حواليها وده اللي سبب لها اضطرابات نفسية كبيرة وصلت بيها في الأخر إنها ماقدرتش تكمل مشوارها الفني ودخلت مصحة رعاية نفسية.

وللأسف بالرغم من إن كوميديا حنان الطويل لسه بتضحكنا إلا إن حياتها انتهت في 1 ديسمبر 2004 وده معناه إنها ماتت في سن صغير (38 سنة) ، بطريقة مؤسفة ومأساوية على الأدوار الكوميدية اللي عملتها، وهي إن بعد دخولها مصحة نفسية ماتت، ولحد دلوقتي ماحدش عارف السبب هل هو انتحار ولا ماتت بسبب شحنة كهربا زيادة ولا بسبب أزمة قلبية 



 

Comments: