القصة الكاملة لأزمة محمد رمضان مع الطيار "أبو الفضل": طلب تعويض ٩ مليون جنيه

12/02/2020

في أكتوبر 2019 انتشر على السوشيال ميديا فيديو لمحمد رمضان وهو بيسوق طيارة وقال إنه هيعمل تجربة جديدة عليه وهي إنه يسوق الطيارة لأول مرة وقام من الكرسي بتاعه ودخل كابينة الطيران ومسك الأجهزة بتاعت القيادة وساق الطيارة، وكان محمد رمضان في الواقعة دي رايح الرياض عشان يحضر الحفلة الغنائية بتاعته.

وبسبب انتشار الفيديو والضغط اللي حصل على وزارة الطيران المدني تم فصل الطيار أشرف أبو الفضل قائد الطيارة ووقف مساعده عن العمل، وبعد حوالي 3 شهور من الأزمة رجعت تاني السوشيال ميديا تتكلم على الأزمة.

ورجعت الأزمة تاني للسطح لإن الطيار أشرف أبو الفضل نشر فيديو بيحكي فيه تفاصيل اللي حصل، وموقفه من محمد رمضان وإنه حاول يوصله بكل الطرق بس مش عارف، وقال في الفيديو إنه راح لمكتبه وقابل المستشار القانوني بتاعه، وقاله إن الموضوع خلصان ومحمد رمضان أكيد مش هيسيب الموضوع، وإنه يومين وراجع، وقال إنه طلب تعويض لكن محمد رمضان كان بيتهرب من التعويض ده.

وقال الطيار إنه لما بعت محمد رمضان يسأله عن التعويض رد عليه "لما نقعد نتكلم"، ووضح إن فاضل في خدمته 40 شهر يعني 3 سنين و4 شهور بس، وقال كمان إنه بيركب معاهم أمراء ووزراء لما حد بيطلب منهم يتصور مايقدروش يقوله لا، وأضاف إنه عارف إن ده مخالف للقوانين وهو عارف عشان كده لما الوزارة اتكلمت معاه هو ماعرفش يرد "أخدت جزائي على الغلط اللي حصل".

وقال محمد رمضان في فيديو له نشره على حساباته على السوشيال ميديا وبعدها مسحه إنه كلم سعيد إمام المدير الفني لشركة روتانا يتواصل مع الكابتن عشان يبعت السي في بتاعه عشان كلم شركة إمارتية وكان الرد بتاعه إنه مش هيبعت السي في.

وكمل الفنان محمد رمضان نفس الكلام اللي قاله في الفيديو اللي اتمسح من على السوشيال ميديا في مكالمة هاتفية مع الإعلامي عمرو أديب في برنامج "الحكاية" اللي بيتذاع على قناة MBC مصر وقال إن الكابتن كان عارف إنه بيتصور فيديو ومش زي ما قال إن تم تصويره من غير ما يعرف.

وقال إن الموضوع بقى أزمة كبيرة وإنه بيحاول يتدخل عشان يحل الأزمة دي ومش عارف وإنه اعتذر للطيار أشرف أبو الفضل عشان الأضرار اللي حصلت له، وإن أبو الفضل بعت المحامي الخاص به للمحاسب بتاعه وقدم له حسبة بتساوي عدد سنين الشغل اللي كانت باقية له اللي هما الـ 3 سنين الباقيين على المعاش وقال إن المبلغ اللي الطيار عايزه هو 9 مليون جنيه ونص.

وقال الفنان للجمهور إنه سايب الحكم للناس اللي بتقول إني اتخليت عنه وسيبته لو شايفين إن طلبه ده يرضي ربنا هعمله مفيش أي مشاكل.

Comments: