"أمازون Dating".. موقع بيبيع بنات ورجالة للارتباط: جديد ومستعمل والشحن مجاني

13/02/2020


على نفس Interface موقع Amazon طلع موقع جديد اسمه Amazon Dating، لكنه مش زي أي موقع تعارف أو Dating زي "تندر"، لا ده موقع "اتجار في البشر" بيتيح شباب وبنات ورجالة وستات للبيع تحت كل صورة شخص منهم سعره ومميزاته وهل هو Used ولا جديد، وأحيانا بيقدم شحن مجاني للأشخاص المعروضين، والأبعد من كده كمان، الموقع بيقدم "ريفيوز" مفصلة عن كل بني آدم معروض للبيع.

للوهلة الأولى، يبدو الموقع مرعب لأنه تجاوز تعريفات الدعارة ووصل للاتجار الحقيقي في البشر، لكن التقليب في الموقع هيخليك تخبط في شخصيات معروضة للبيع زي "كوكي" الشخصية الشهيرة في مسلسل "شارع سمسم" أو sesame street الأمريكي، واللي هتثبت لك إنها فكرة شبابية ذكية دمها خفيف، رغم جديتها وإنها "مسبوكة" حلو.

اللطيف في الموقع إنه معمول بالظبط بنفس تصميم وواجهة ولوجو "أمازون" لدرجة تخلي المستخدم في النظرات الأولى مستحيل يفرق بينه وبين الموقع الأصلي، حتى أقسام الموقع نفسها شبه بعضها زي Deal of the day و Prime Video و Help.

اللي ورا الموقع هما بنتين شباب "آن أكوبيان" و"سوزي شين"، واللي رغم إن موقعهم "بارودي" أو ساخر إلا إنه - وبحكم التطور والتنوع الكبير في الأبلكيشنز مؤخرا - بيفتح باب التوقعات والمخاوف في نفس الوقت من إن الرأسمالية ممكن تقدم فلسلفة جديدة تحول على أساسها بيع البشر لحاجة مقبولة وشكل من أشكال الحداثة.

Comments: