قصة إلغاء فقرة محمد رمضان في ماتش السوبر: أزمة الطيار ولا مشكلة في التنظيم؟

16/02/2020

الأسبوع اللي فات قامت خناقة على السوشيال ميديا بين الفنان محمد رمضان والطيار أشرف أبو الفضل اللي اتوقف عن العمل بسبب الفيديو اللي نشره "رمضان" وهو معاه في كابينة الطيارة، ووطلب الطيار من محمد رمضان فلوس كتعويض عن وقفه عن العمل لكن محمد رمضان نشر فيديوهات وصور على حساباته الرسمية بيتريق فيها على الطيار زي الصورة اللي نشرها وهو على سرير المستشفى وكتب عليها "كابشن": "تم وقف الدكتور اللي صوره" واللي بعدها عدله لـ"قلب".

وبالتالي بسبب المشكلة دي بدأ جمهور محمد رمضان يهاجمه على السوشيال ميديا، لدرجة إنهم عملوا حملة ضده وعملوا هاشتاج "قاطعوا محمد رمضان" وصفحة بنفس الاسم واللي عدت في خلال ساعات 250 ألف عشان يتم إلغاء الفقرة الغنائية بتاعته في احتفالية السوبر المصري بين الأهلي والزمالك اللي هتكون يوم الخميس في أبو ظبي.

وبعدها انتشرت أخبار على السوشيال ميديا بتقول إن فعلا تم إلغاء الفقرة بتاعت محمد رمضان وانتشرت أخبار تانية بتقول إن الفنان اللي هيحيي الحفلة مكانه هو محمد حماقي، لكن صرح مسؤول عن تنظيم الحفلة وقال إن تم إلغاء الفقرة الغنائية في الحفلة خالص مش فقرة محمد رمضان بس لظروف خارجة عن إرادة الجميع وقال إنها مسألة خاصة بالتنظيم ومالهاش علاقة بالفنان من قريب أو من بعيد.

وقال كمان إن الموضوع ده متداول من فترة من حوالي أسبوعين من قبل ما يتم انتشار أزمة الطيار ومحمد رمضان أصلا، وقال إن مجلس أبو ظبي بيحاول مع اتحاد الكرة المصري إنهم يعملوا الحفلة.

Comments: