٧ حاجات عن عمر كمال غير أغنية بنت الجيران: لحن أعمال لحمادة هلال وهاني شاكر

17/02/2020

بعد الانتشار اللي حققته أغنية بنت الجيران وبسبب النجاح اللي عملته وظهورها تريند لفترة طويلة غنى عمر كمال وحسن شاكوش الأغنية في حفلة عيد الحب اللي كانت في استاد القاهرة، وبسبب جملة "تسبيني اشرب خمور وحشيش" اعترض الناس على السوشيال ميديا إن الجملة دي تتغنى أو تتقال عموما في ستاد القاهرة.

وبسبب الأزمة دي منع نقيب الموسيقيين الفنان هاني شاكر مغنين الأغنية عمر كمال وحسن شاكوش وكل مغنين المهرجانات من الغنا نهائي وقال إن القرار بينطبق على الجميع.

وطبعا القرار ده كان بيشمل عمر كمال مغني أغنية بنت الجيران اللي هو عضو نقابة الموسيقيين واللي له أعمال تانية غير الأغاني الشعبية اللي انتشرت له مؤخرا وكان فيه منها أعمال بالتحديد مع هاني شاكر، عشان كده هنقولك شوية معلومات عن عمر كمال لو ماتعرفهوش:

1- عمر كمال بدأ الغنا وهو عنده 17 سنة أو تحديداً من 2007 يعني من حوالي 13 سنة، لكن الحظ لعب معاه الفترة دي واتشهر.

2- هو عضو نقابة موسيقيين من 4 سنين 

3- عمر كمال اتعاون مع نجوم كتير ولحن لهم أغاني ومن أهمهم تعاونه مع هاني شاكر في أغنية غناها نقيب الموسيقيين وهي أغنية "أبويا" واللي انتشرت وقتها وغناها هاني شاكر في حفلة له وقال إن اللي غناها ولحانها شاب اسمه عمر كمال.

4- اشتغل برضه مع حمادة هلال في ألبومه اللي لسه هينزل قريب ولحن له أغاني 

5- الفنان محمد فؤاد قال إنه بالنسبة له عمر كمال زي ابنه وقال إن صوته جميل وقال كمان إنه عارفه من وقت ما كان طفل، خصوصا إن فيه ناس كتير شبهت صوتهم ببعض.

6- عمر كمال له أعمال تانية غير بنت الجيران نجحت وحققت مشاهدات عالية على اليوتيوب زي "الغربة" و"شمس المجرة"

7- من ضمن خطط عمر كمال الحالية إنه بيلحن ألبوم جديد لنقيب الموسيقيين هاني شاكر اللي منعه من غنا المهرجانات.

Comments: