الزمالك: 6 سنين من التهديدات بالانسحاب والرجوع فيها 

24/02/2020

من المقرر إن ماتش الأهلي والزمالك هيتعلب النهاردة الاتنين 24 فبراير 2020 لكن أعلن مجلس إدارة نادي الزمالك برئاسة المستشار مرتضى منصور امبارح الأحد 23 فبراير انسحاب نادي الزمالك من الدوري المحلي، ده غير إن لعيبة نادي الزمالك غادروا فندق الإقامة بعد طلب النادي منهم ده بسبب اعتراض النادي على اللجنة الخماسية برئاسة عمرو الجنايني واللي وصفها النادي إنها لجنة غير شرعية.

لكن صرح الإعلامي أحمد شوبير النهاردة 24 فبراير الصبح إن الزمالك هيتراجع عن قرار انسحابه وهيلعب مبارة القمة عادي، بس بعدها بساعة لغى نادي الزمالك التمارين اللي كان المقرر هيكون الساعة 11 الصبح، وآخر الأخبار اللي تم تداولها عن لعب نادي الزمالك النهاردة هي إن المدرب الفني لنادي الزمالك الفرنسي  باتريس كارتيرون إنه لسه مش عارف هل  مجلس الإدارة هيتراجع عن قراره وهيلعبوا الماتش ولا هيصروا على قرارهم.

تهديد نادي الزمالك بالانسحاب مش أول تهديد ولا دي أول مرة، خلينا نفتكر تهديدات نادي الزمالك بالانسحاب في آخر كام سنة:

1- في 2014:

سنة 2014 أعلن نادي الزمالك انسحابه من الدوري بعد قرارات الحكم محمود عاشور في ماتش الزمالك وإنبي اللي خلص بنتيجة 3-0 لإنبي وهدد الزمالك بالانسحاب كنوع من الاعتراض على قرارات الحكم بس رجع في كلامه.

2- في 2015:

في ديسمبر 2015 اعترض الزمالك على قرارات حكم الماتش اللي لعبه مع طلائع الجيش، بعد ما الحكم حسب ضربة جزاء لطلائع الجيش وطرد لاعب الزمالك وقتها علي جبر وهدد بالانسحاب برضه.

3- في 2016:

في شهر مايو 2016 طرد الحكم طارق سامي لاعبين وهما أحمد علي وأحمد مودي في ماتش الأهلي والمقاولون العرب بعد اعتراضهم عليه، وبعدها اعترض نادي الزمالك على الحركة دي لإنهم شكوا بوجود نية إن الحكام هيهدوا البطولة للمنافس وهو النادي الأهلي وهدد بالانسحاب.

4- في 2016: 

في سبتمبر 2016 هدد الزمالك بانسحاب فريقه من الدوري الممتاز لو رجع جمال الغندور لمنصب رئيس لجنة الحكام في اتحاد الكرة المصري، بعد ما حسب الحكم إبراهيم نور الدين ضربتين جزاء للنادي الأهلي قدام الاتحاد السكندري.

5- في 2016:

في ديسمبر 2016 اعترض الزمالك على قرارات الحكم جهاد جريشة حكم ماتش الأهلي والمصري لإنه تغاضى عن ضربة جزاء لصالح فريق بورسعيد، وهدد بعدها بالانسحاب من الدوري.

6- في 2017:

في شهر يناير اعترض الزمالك على تطبيق نظام الاستبدال في انتقالات يناير اللي كانت من اتحاد الكرة المصري وهدد بالانسحاب برضه

7- في 2017:

في فبراير 2017 هدد الزمالك بالانسحاب من الدوري بسبب تغاضي الحكم جهاد جريشة عن احتساب ضربة جزاء للزمالك قدام نادي المقاصة.

8- في 2019:

هدد نادي الزمالك بالانسحاب من الدوري المصري بعد ما صدر ضدهم قرار من اتحاد الكرة بتغريمهم 200 ألف جنيه وإحالة النادي للجنة الانضباط بعد ما التصريحات اللي قالها ضد الحكام المصريين، ووقف برنامج "الزمالك اليوم" اللي كان بيتذاع على قناة المحور الفضائية.

Comments: