٦ علامات بتدل على في علاقة صداقة مؤذية

25/02/2020

أحسن حظ ممكن أي شخص ياخده في علاقاته الإنسانية بالناس هي إن يبقى عنده صحاب جدعان أو صحاب جنبه دايما وعلاقتهم تتطور وتكبر مع الوقت والسنين، يمكن عشان أهمية علاقة الصحاب في حياتنا فهتلاقينا بنعدي حاجات كتير في تفاصيل العلاقة عشان صحابنا يكملوا معانا خصوصا إن فركشة الصحاب بتبقى أصعب من فركشة العلاقات العاطفية.

ولإن علاقة الصداقة بتأثر فينا بشكل مبالغ فيه، فمن الأحسن تبقى مركز في اختيار صحابك، ومركز مع تصرفاتهم وكلامهم عشان أصغر تفاصيل في علاقتكوا ممكن تأذيك.

خلينا نقولك شوية علامات تعرف بيها إن علاقتك بصحابك علاقة بتأذيك ومش لازم تستمر حسب موقع "psychology today" وهما:

1- لما تلاقي صاحبك غيرانين من علاقات صحابك التانية اللي في حياتك:

أكيد كلنا عدى علينا نوع الصاحب ده اللي بيحب صحابه حب امتلاك، بيبقى بيزعل وبيتضايق لو خرجت واتبسطت مع صحابك التانين أكتر منه، وبيتضايق جدا لو حس إن عندك صاحب أقرب ليك منه، النوع ده من الصداقات بيبقى مؤذي فمن الأحسن إنك تاخد فيه خطوة لورا.

2- فيه خلل في التواصل اللي بيحصل بينكوا:

يعني مثلا لما صاحبك يكلمك ويحكيلك قد إيه يومه كان فيه أحداث سواء كانت حلوة أو وحشة، فإنت تسمعه طول المكالمة ولما ييجي عليك الدور عشان تتكلم إنت أو تحكي عن اللي حصل في يومك فهتلاقي صاحبك بيقولك إنه مش فاضي عشان أي سبب وإنه لازم يقفل ومش هيسمعك، خليك عارف إنك مش لازم تقبل موقف زي ده وإنك لو كلمته فيه ورد فعله ماكنش مناسب فحقك تاخد خطوة لورا في العلاقة دي.

3- دايما بينتقدك:

الصراحة بين الصحاب من أهم عمدان العلاقة، ويمكن الصراحة لوحدها فكرة لطيفة بس لما بتتقلب بنقد هدام بتبقى مخيفة ووحشية، كان حد بيهاجمك طول الوقت بس، يعني تخيل عشان تبقى عملت موقف مع حد من صحابك مش عاجبه فتلاقيه بيحكم عليك وبيتهمك إنك أناني مثلا أو متطلب أو شخص سيء، يمكن تحس إنك مفزوع أصلا مش حاسس إحساس وحش بس، ويمكن اللي حصل هو إن صديقك ده بيعمل عليك إسقاط للعيوب اللي في شخصيته مش في شخصيتك إنت.

4- لو إنت بس اللي بتتصل أو بتسأل عليه دايما:

فيه علاقات صداقة بتنتهي كتير بسبب الموضوع ده إن فيه طرف بيسأل على الطرف التاني أكتر هو اللي بيتصل أو هو اللي بيبعت على الواتساب، ويمكن العلاقات دي بتنتهي لإن الطرف اللي بيسأل دايما بيحس إن الطرف التاني مش مهتم به أو مش مهتم بوجوده في حياته أصلا، في العموم يعني العلاقات بتبقى مؤذية أكتر لما بيبقى فيه طرف بيستثمر في الطرف التاني أكتر.

5- صاحبك بيقولك إنك لازم تتغير:

كل شخص فينا عنده حاجة وحشة في شخصيتنا، ويمكن الحاجة اللي بتضايق أكتر إن الشخص اللي بيقولك لازم تتغير مايبقاش هو كمان شايف عيوبه، ماتمنعش إنك تتغير بس الغير منطقي هو إن الشخص يبقى بيلوم عليك إنت بس ومايبقاش شايف نفسه ولا عيوبه والتغيير ده يبقى متوقف عليه إن علاقتكوا تكمل أو لا.

6- تلاقي نفسك واخد بالك من كل كلمة وتصرف مع صاحبك:

في الأول الموضوع بيبقى منطقي ومفهوم لإنك مش عارف الشخص اللي قدامك وبتتعامل معاه بهجوء عشان تعرف شخصيته وبتاخد بالك من كلامك وتصرفاتك معاه، بس لما الوقت يمر في العلاقة دي وتلاقي نفسك لسه بتتصرف زي ما إنت وبتاخد بالك من الصغيرة والكبيرة في كلامك ده يبقى مؤشر خطر لإنك لازم تكون على طبيعتك في علاقتك مع صحابك القريبين.

في النهاية خليك عارف إنك عايش عشان تعمل علاقات طول حياتك، مش مهم العلاقات تفضل مستمرة طول العمر، المهم إن العلاقات ماتكونش مؤذية أو متعبة بالنسبة لك، ولو لقيت العلامات دي في صحابك وقررت تقلل علاقتك بيهم أو تقطعها اعرف إنك هتعمل صحاب تاني وتالت طول ما إنت عايش.

Comments: