بعد أكتر من 6 مليون مشاهدة.. "يوتيوب" حذف مهرجان حسن شاكوش وعمر كمال "عود البطل"

04/03/2020

مطرب المهرجانات حسن شاكوش نزل إمبارح على الأكونت الرسمي بتاعه أغنية بعنوان "عود البطل" ونزلها برضه على قناته على "يوتيوب"، وغنى معاه المهرجان ده عمر كمال، وده كان أول مهرجان ينزل ليهم بعد الأزمة اللي حصلت مع نقابة المهن الموسيقية، واللي بعدها اتمنع الأتنين عمر كمال وحسن شاكوش من مزاولة النشاط الفني في الأفراح والحفلات.

الأغنية بعد ما نزلت بساعات حققت نجاح كبير واتصدرت مؤشرات البحث على "جوجل" ومواقع التواصل الاجتماعي ووصلت إنها بقت تريند رقم 1 في مصر والأردن والكويت وليبيا ورقم 2 في الإمارات على حسب "سكرين شوتس" نشرها حسن شاكوش على صفحته الرسمية على فيسبوك.

وحققت الأغنية على "يوتيوب" أكتر من ٦ مليون مشاهدة في 24 ساعة تقريبا، لكن اللي حصل إن النهاردة إن موقع "يوتيوب" حذف الأغنية لأسباب غير معروفة لحد دلوقتي.

وبعدها نزل عمر كمال على صفحته الرسمية على الفيسبوك وقال "نفس اللى حصل في "بنت الجيران" بيحصل تاني في "عود البطل" ... الاغنية اتوقفت بعد 7 مليون مشاهدة في أول يوم ودي محصلتش تماما مع أى أغنية نزلت قبل كده .. بس معلش خير والله حصل كده في بنت الجيران وبقت ١٧٠ مليون .. متفتكرش إنك لما تحاول توقف عمر كمال وشاكوش هتاخد رزقهم أو شهرتهم يعنى.. أو غيابهم هيديك فرصة للظهور .. عايز تنجح اشتغل واتعب وفكر مش تأذي الناس.. شوية وقت والأغنية هترجع و هنرجع أقوى وأنجح".

ولحد دلوقتي مش معروف مين السبب في إنه يقفل الأغنية لعمر كمال وحسن شاكوش، بس من الواضح من كلام عمر كمال إن منافس ليهم هو السبب.
 

Comments: