"مولتو ماجنم".. إزاي Icon Creations عملت ترند "بالورقة والقلم"؟

05/03/2020


مؤخرا، مابقتش حملة الإعلانات الناجحة أقصى طموح المعلن، مابقتش كفاية مهما حققت نجاح ومهما كانت شاملة ومتنوعة في وسايل تقديمها (تلفزيون - راديو - outdoors - سوشيال ميديا).  في 2020 نجاح حملة الإعلانات بالنسبة لأي "براند" هي البداية أو الفرصة لتحقيق ربط أقوى بين الجمهور والبراند بتحويل المنتج أو الإعلان - أو الاتنين مع بعض - لترند على السوشيال ميديا بيتفاعل من خلاله الجمهور مع الحملة وبيشارك بتعليقات و"ميمز" تخليه جزء من الترند، وتساعد الإعلان يفضل في الصورة أكبر فترة ممكنة.
 

ده بالظبط اللي عملته Icon Creations، وهي الشريك المسؤول عن الميديا والمنصات الديجيتال لـ"مولتو" من الـ Creatives الخاصة بالإعلانات للـ Moderation  على السوشيال ميديا، ده غير إنها المسؤولة كمان عن الـ Media Buying في شراكة عمرها 4 سنين، وبالتالي قدرت من خلال إدارتها الإعلامية/ الإعلانية للبراند، إنها تدعم حملة "ماجنم" في أكتر من اتجاه وعلى كل المنصات (فيس بوك - إنستجرام - أنغامي - تيك توك - AirPush) بأكتر من خطوة مدروسة و content تم التجهيز ليه من بدري:

- الـ Teaser

في 13 فبراير نزلت Icon Creations بـ Teaser Post على صفحة "مولتو" بديزاين مقسوم نصين بلونين مختلفين ومكتوب عليه "اجهز للي جاي"، والبوست خلى أغلب المتابعين يروحوا لإن اللي جاي ده هيبقى "ميكس" بين طعمين مختلفين في نفس المولتو، وفعلا حقق البوست تفاعل لا بأس بيه بحوالي بـ 150 تعليق أغلبهم بيخمن الجديد اللي مولتو هتعمله، عشان يمهد لنزول حملة "مولتو ماجنم باظظ.. باظظ خالص"، وكان تميم يونس - مخرج و creative الإعلانات المعروف - من ضمن اللي علقوا واستفسروا عن المنتج الجديد
 


- الـ Moderation الذكي

 خفة دم في التعليقات واستخدام ذكي للثقافة الشعبية متمثلة في "ميمز" الأفلام المصرية، خلت التفاعل مع الإعلانات على صفحة "مولتو" مشجع أكتر للجمهور، واتحول الموضوع من هزار لطيف على الصفحة لإعجاب حقيقي من الناس بالـ Marketing والسوشيال ميديا المسؤولين عن "مولتو"، واللي ظهر في تعليقات كتيرة بتحيي ذكاء القائمين على الصفحة واختياراتهم للـ"ميمز" واللي كان باين جدا إنها متحضرة من بدري في مكتبة جاهزة يردوا بيها على كل التعليقات بشكل سريع.

التعليقات الذكية والسريعة زودت التفاعل بشكل كبير جدا، لدرجة إن فيديو الإعلان حصد أكتر من 30 ألف تعليق، وهو رقم كبير في ظل إن الفيديوهات عموما بيبقى متوقع إنها تحصد مشاهدات أكتر من التعليقات.


- التجهيز للترند

من أذكى الأفكار اللي مكنت Icon Creations تحافظ على الترند عايش لفترة طويلة، هو تجهيزها الجيد للترند من قبل ما يطلع، الشركة كانت عارفة إن حملة الإعلانات هتـ Go Viral بسبب أبطالها وبسبب خفة دم الأغنية على اللحن، عشان كده طلبوا من ماجد الكدواني وروبي وأحمد مالك تصوير مقاطع فيديو قصيرة يستخدموها في الرد على تعليقات الجمهور اللي هتيجي بعد ما الفيديوهات تنزل، اللطيف في الموضوع واللي بيبين قد إيه كانت الشركة مذاكرة ومجهزة كويس، هو إن مقاطع الفيديو اتصورت قبل تصوير الإعلانات نفسها.


- خناقة "تودو"

كالعادة دخلت "تودو" على الخط وشاركت في الترند، وبسرعة اتحول الموضوع لخناقة وتلقيح بين الصفحتين، وبينت الخناقة إزاي الـ Content Creators والـ Moderators يقدروا يحولوا خناقة براندين لسكتش خفيف يتابعه الجمهور، ومع الوقت والتفاعل، الخناقة كبرت ودخل فيها براندات تانية زي "هوهوز" و"بيك رولز" و"توينكيز"، بتعليقات متبادلة طول الوقت و Posts فيها Designs كل "براند" بيحاول "يعلم" فيه على البراندات التانية، وده كمان اتطور بعد كده لإن الجمهور نفسهم بدأوا يردوا ويكتبوا تعليقات بيتكلموا فيها على لسان البراندات الخمسة.


- استغلال المنصات المختلفة

من التفاصيل المدروسة في حملة Icon Creations لاستغلال كل مصادر القوة في إعلان "ماجنم" هي إدراك الشركة لطبيعة الاختلافات بين جمهور التطبيقات المختلفة، عشان كده طرحت أغنية الإعلان على أبلكيشن "أنغامي"، عشان توصل لجمهور جديد ممكن ماتوصلوش الإغنية على "فيس بوك"، ده غير إنها سوقت الحملة على أبلكيشنز تانية غير "فيس بوك" و"إنستجرام"، زي "تيك توك" و AirPush.

Comments: