بسبب فيروس "كورونا": 7 تغييرات عالمية واقتصادية 

09/03/2020

العالم كله مؤخرا اتأثر بفيروس كورونا حتى لو مش عن طريق العدوى ودخول المرض للبلد فهو عن طريق الاقتصاد أو الأحداث الاقتصادية اللي بتحصل بسبب كورونا، وده غالبا اللي بيحصل الفترة دي بما إن فيروس كورونا بيشكل أزمة عالمية، فالأزمة دي أثرت على أسهم البورصة بشكل مختلف وأثرت على أرباح الشركات بالنقص وشركات تانية بالزيادة.

جمعنا أكتر التطورات العالمية اللي حصلت الفترة اللي فاتت بسبب فيروس كورونا:

1- بالرغم من انخفاض أسهم البورصة بشكل ملحوظ والخساير اليومية اللي بتحصل كل يوم إلا إن أسهم شركة "نتفليكس" ارتفعت من أول السنة بنسبة 17%  والتفسير اللي قاله خبراء البورصة هي إن لما الناس بيقعدوا في بيوتهم عشان خايفين من الإصابة بفيروس كورونا بتزيد نسبة مشاهدتهم للأفلام والمسلسلات اللي بتتعرض على نتفلكس، وده طبعا بيبزود عدد المشتركين الجداد.

2- بسبب خوف الناس من النزول عموما أو إنهم يختلطوا بناس جديدة عشان العدوى فأغلب الناس بقت تحب تتمرن في بيوتها بدل ما يروحوا "جيم"، فعدد الناس اللي بيشتروا عجلة الرياضة المنزلية "بيلوتون" عشان يمارسوا رياضة من بيتهم زاد جدا الفترة اللي فاتت خصوصا إن العجلة دي بتوفر خدمة التدريب الافتراضي اللي ممكن تتواصل فيها مع متدربيين تانين من غير ما تحتاج تشوفهم وجهاً لوجه.

3- الشركات المتخصصة في الاجتماعات عن طريق الفيديو صرحوا وقالوا إن الاجتماعات اللي عن طريق الفيديو شهدت إقبال كبير في فترة قصيرة، خصوصا إن فيه شركات كبيرة زي أمازون وجوجل ومايكروسوفت في الولايات المتحدة خلت موظفيها يشتغلوا من البيت.

4- "السوبر ماركتس" الكبيرة ظهر فيها حالة من قلة المنتجات والمواد الغذائية والظاهرة دي اتسمت ظاهرة الهامستر لإنها شبه حيوان الهامستر اللي بيخزن الأكل في بوقه، ده غير إن الطلبات في شركات زي "أمازون" و"علي بابا" زادت لإن الناس خايفة تخرج تعمل "شوبينج".

5- فيه أشخاص معينين بدأوا يعملوا مليارات بسبب فيروس كورونا زي "ليم ووي تشاي" اللي ماسك الحصة الأكبر من شركة "توب جلوف" الماليزية اللي بتعمل جونتيات طبية، وانضم له كمان "ستيفان بنسل" رئيس شركة الأدوية "مودرنا" لإن أسهم شركته ارتفعت بعد ما أعلنت شركته عن تقديم طلب عشان يبدأوا اختبارات بشرية للقاح جديد ضد فيروس كورونا.

6- بسبب خوف الناس من العدوى برضه وتفضيلهم إنهم يشتغلوا من البيت، بدأت شركات تانية تاكل عيش على الكلام ده زي شركة TeamViewer الألمانية اللي زاد عدد مستخدميها بشكل واضح جدا الفترة اللي فاتت بالتحديد في الصين لدرجة إن خلال يومين بس ارتفعت أسهم الشركة لـ 20%.

7- نشرت ناسا صور بالأقمار الصناعية بتوضح فيها إن حصل انخفاض كبير لمستويات التلوث في الصين وده بسبب الانخفاض القياسي اللي حصل في مصانع الصين لإن العمال والمصانع متوقفين عن العمل في محاولة من البلد لاحتواء فيروس كورونا.

Comments: