٦ نصايح هتساعدك ماتلمسش وشك للوقاية من فيروس "كورونا"

11/03/2020

طول عمرنا بنتعامل على إن ايدينا حاجة عادية على وشينا بس الغلط إنها تبقى مش نضيفة وناكل بيها مثلا أو مانغسلهاش قبل الأكل، بس ايدينا على وشنا عادي مافيهاش حاجة، لحد ما ظهر فيروس كورونا وبدأت منظمة الصحة العالمية تحذر الناس من إنهم ما يلمسوش وشهم بإيديهم للوقاية لأن الفيروس بينتقل عن طريق القطرات والرزاز اللي ممكن يكون على إيدك بسهولة ولكن هيدخل لجسمك عن طريق العين أو الفم أو الأنف لما تلمسهم بإيدك، وقالوا الكلام ده كده بكل سهولة كأنه عادي إنك تقدر ماتلمسش وشك بإيدك، مع إن المسؤولين نفسهم وهما بيقولوا التحذيرات دي بدأوا يلمسوه بإيدهم.

وعن طريق دراسة اتعملت وقالها موقع "wired" إن الناس بيلمسوا وشهم بمعدل 23 مرة في الساعة أو مرة كل دقيقتين ونص، وده طبعا شئ مش مناسب في التعامل مع فيروس كورونا وعلى أساس كده بدأوا الناس يعملوا فيديوهات على السوشيال ميديا وهما بيحاولوا مايلمسوش وشهم، ويمكن أصلا الموضوع صعب عشان إنت بتحط إيدك على وشك من ساعة ما اتولدت وعلميا الأجنة كمان بيلمسوا وشهم بإيدهم وده وفقا لدراسة اتعملت مؤخرا على 15 ست حامل من الأسبوع الـ 24 للاسبوع الـ 36 عن طريق موجات فوق صوتية إن الأجنة بتحط إيدها على وشها لما امهاتهم بيحسوا بتوتر.

لكن فيه شوية نصايح يمكن مش كتير بس هما مفيدين عشان تبعد ايدك عن وشك اليومين دول فحاول تلتزم بيهم كنوع من الوقاية من فيروس كورونا وهم:

1- خلي إيدك مشغولة بحاجة أغلب الوقت:

واحدة من أهم الطرق اللي تشغل بيها إيدك عن وشك هي إنك تخلي إيدك مشغولة أصلا بحاجة تانية زي إنك تجيب كرة تضغط عليها وتستخدمها وده هيقلل المرات اللي هتلمس فيها وشك.

2- استخدام العطور والروايح النفاذة:

 وفي دكتور في علم النفس اسمه "زاك سيكورا" في شيكاغو قال إن المعطرات أو الروايح ممكن تبقى بتساعد كمان في إنك تبعد إيدك عن وشك لإنك لما بتقرب إيدك بتشم ريحة فممكن تبعدها تاني.

3- خلي جنبك دايما كيس مناديل:

أول ما تحس إنك عايز تهرش في مناخيرك أو تدعك عينك أو حاجة من الحاجات دي اسحب منديل واعمل به كده أحسن، ولو عايز تعطس فالأحسن إنك تعطس في منديل ولو مافيش يبقى الأحسن إنك تعطس في كوعك بدل ما تعطس في كف إيدك لإن العطس في إيدك احتمال إنه ينقل الجراثيم للناس اللي حواليك كبير.

4-اعرف الحاجات اللي هتضرك:

دكتور في جامعة نيويورك اسمه "راابي" قال خليك بس على علم بالحاجات اللي ممكن تعديك، فقبل ما تلمس وشك اقف لحظة كده وفكر إذا كانت إيدك ممكن تضرك ولا لا، واسأل نفسك عن السبب اللي هيخليك تلمس وشك أصلا، فلو كنت عايز تدعك عينك عشان حرقاك فممكن تستخدم قطرة عشان الجفاف مثلا، ولو كنت عايز تلمس دقنك أو شعرك ففكر كويس قبل ما تحرك ايدك.

ده غير إن فيه دكتور تاني اسمه "جاستن كو" وهو دكتور مساعد في الأمراض الجلدية في "ستانفورد هيلث" قال إنه بقى يشجع المرضى اللي بيلبسوا عدسات لاصقة مثلا إنهم يلبسوا نضارات وده ممكن يحميهم من الدعك في عينهم.

5- خلي حد ينبهك قبل ما تلمس وشك:

قول للناس اللي إنت قاعد معاهم يخلوا بالهم منك وإنت بتحرك إيدك ناحية وشك وإنت كمان اعمل كده، نبهوا بعض قبل ما تلمسوا وشكوا.

6- ماتبقاش موسوس:

فيه دكتور في علم النفس اسمه "ستيو شانكمان" من جامعة نورث وسترن قال إن نصيحته هي إن الناس يقللوا الضغط والقلق اللي عندهم بدل ما يقلقوا هما بيلمسوا إيه لإن الضغط بيأثر على المناعة وكل ما الضغط بيزيد على الشخص كل ما بتقل قدرته على مقاومة العدوى، وقال كمان إن طالما إيدك نضيفة فالموضوع مش هيبقى كارثة يعني لما تلمس وشك، ده وإنها مش نهاية العالم.
 

Comments: