تفسير تغير لون السما للأصفر والأسود في عز الضهر 

12/03/2020

بسبب سوء الأحوال الجوية والعاصفة الترابية والسيول والرعد والبرق اتحولت سما القاهرة وبعض المحافظات من كام ساعة النهاردة الخميس 12 مارس 2020 للون الأصفر وفي بعض الأماكن ضلمت خالص في عز الضهر في حوالي الساعة 1 ونص كأننا بليل.

وبدأ بعض الناس يقلقوا وناس تانية بدأت تتوقع إن دي نهاية العالم وناس تانية -الأكبر سناً- افتكروا إن الظاهرة دي مش أول مرة وإنها حصلت مرة سنة 1994 في موجة سيول جت على مصر.

لكن الحقيقة إن الظاهرة دي ليها تفسير علمي وفسره خبير بيئي لبعض المواقع وهي بسبب الغيوم والسحاب اللي بيحجبوا أشعة الشمس وده بيأثر على مستوى الضوء، ده غير وجود عاصفة ترابية جاية من الصحرا وفيها رمال وأتربة وده كان السبب إن لون السما يتحول للون الأصفر.

بالإضافة كمان إن الأتربة والرمال اللي في العاصفة الترابية لما بيختلطوا بالهوا الملوث الناتج من دخان المصانع والحرايق، بيبقى النتيجة بتاعتهم سحابة سودا ودي كانت السبب في الضلمة اللي حصلت الضهر أو إن السما تظهر باللون الأسود زي ما حصل كده.

وقال امبارح الدكتور محمود شاهين مدير إدارة التنبؤات في الهيئة العامة للأرصاد الجوية إن المناطق الشمالية والجبلية هتكون فيها أمطار أكتر شدة ووضح إن دي حالة طبيعية لإننا في آخر الشتاء والفترة دي بتتميز بتقلب الأحوال الجوية، وشبه فعلا إن اللي الحالة الجوية دي زي اللي حصلت سنة 1994.

Comments: