كلام فشنك | ما بين التهدئة والتشجيع على الاستهتار.. طلّت علينا مي الخرسيتي

16/03/2020

كتب: محمد إنسان

الأمر الواقع الأيام دي ولازم يتاخد على محمل الجد، هو إننا لازم نتأكد من كل كلمة نسمعها وكل معلومة نقرأها أو نشوفها في أي مكان من أكتر من مصدر موثوق، خلاص وقت إنك تصدق مذيع أو دكتور أو باحث واحد انتهى.. العالم قرية صغيرة وكلنا نعرف طرق كتير عشان نتأكد من كلام حد إذا كان صحيح أو لا.. يعني مانصدقش أي حاجة نسمعها وخلاص لمجرد إنها بتخلينا نطمن.

في الأيام اللي فاتت انتشرت أكتر من إشاعة بأكتر من أسلوب، لكن حاولنا في "ذا جلوكال" إننا ندور وراء كل الإشاعات دي ونتأكد من صحتها وبالفعل وضحنا كل حاجة قدامكم.

لكن في الساعات القليلة اللي فاتت ظهر على السوشيال ميديا فيديو مدته 15 دقيقة تقريبًا من مي الخرسيتي الناشطة على وسائل التواصل الاجتماعي، بتلوم فيه الشعب المصري على خوفه من فيروس كورونا وبتنتقد طرق الوقاية اللي بيتبعها عشان يحمي نفسه من الاصابة بالمرض، واتكلمت عن نظرية مؤامرة بتقوم بيها أمريكا عشان تسيطر اقتصاديًا على العالم.. تعالوا نشوف ونعقب ببساطة شديدة على بعض النقط اللي اتقالت في الفيديو.

- "مي" قالت في بداية كلامها إن غير شهادتها الجامعية اللي متعلقة هتستخدم القرآن الكريم وتستشهد بيه والمشاهدين أحرار يصدقوها ولا لا، وبالفعل مي قالت آية من القرآن الكريم " أَيْنَمَا تَكُونُوا يُدْرِككُّمُ الْمَوْتُ وَلَوْ كُنتُمْ فِي بُرُوجٍ مُّشَيَّدَةٍ ۗ" لكن في الحقيقة إنها طول مدة الفيديو ماقالتش معلومة علمية واحدة ولا استخدمت شهادتها وعلمها اللي تباهت بيهم في أوقات كتير من الفيديو عشان تثبت صحة كلامها أو صحة حقيقة بتقولها!

-  بعد كدة قالت "خريستي" إن ربنا هيحاسبها لو ماوضحتش كل اللي تعرفه ومشاركتناش المعلومة اللي هي عرفاها وقالت إن قدامها أكتر من مصدر لكلامها

طب إيه هي المعلومة اللي هي عرفاها؟

إن أمريكا هي مصدر الذعر وان العالم كله بيتضحك عليه وإن كل اللي بيحصل تهويل منها عشان اقتصادها بيتهز وبتعمل كدة عشان المناديل تغلى! -آه حضرتك قريت صح هي قالت فعلًا عشان المناديل تغلى-

طب ايه المصادر اللي قولتي عليها يا "مي"؟

"مي" في الحقيقة طول الفيديو ماذكرتش مصدر واحد من اللي قالت عليهم.. هي حركتهم بس على الترابيزة اللي قدامها وشاورت بيهم ومسكت الموبايل وقالت ان فيه مصدر لو افتكرت هبقى اوريهلكم!

- بعد كدة "مي" وجهت كلامها للمصريين بعنف أنهم بيستخدموا الكمامة وقالت "أنتوا يا مصريين اللي 90% من الوقت بتشموا عوادم السيارات بتسخدموا ماسكات؟" وده طبعًا تعنيف مش في محله منها لإن مش من حقها تعنف أي شحص على إجراء وقائي بياخده حتى لو كان مبالغ فيه.

- "مي" نهت كلامها بالفيديو بواصلة تعنيف تانية للمصريين برضه وقالت إن عيب علينا إن واحد مصري يخاف من كورونا وهو في مصر وانها كـ "عالمة" على حد وصفها، وشافت كل حاجة وعارفة كل الحقايق في أمريكا هتوضحهالنا وهتنقلنا كل اللي شافته.. لكن برضه للأسف لحد نهاية الفيديو مانقلتش معلومة واحدة دقيقة ولا ذكرت حقيقة واحدة بمصدر واحد حقيقي.

أخيرًا إحنا بنقول لـ مي الخرسيتي معلومات مؤكدة وموثقة إن فيروس كورنا خطر بيهدد العالم وعلى سبيل المثال:
- إيطاليا امبارح بس سجلت أكتر من 360 حالة وفاة جديدة و 3000 الاف إصابة جديدة بكورونا.
- وإن مصر خصصت 100 مليار جنيه لمواجهة الفيروس وعلقت الدراسة ورحلات الطيران ومعظم التجمعات والفعاليات الكبرى وغيرهم من الاجراءت الوقاية ورفعت درجة الاستعداد القصوى.

- وإن رئيس وزراء بريطانيا قالها بكل صراحة للشعب الإنجليزي إنهم يستعدوا لتوديع أحبائهم.
- وإن اسبانيا والمانيا وأوربا بأكلمها اتقفلت لإنها بقت بؤرة لانتشار الفيروس
- وإن منظمة الصحة العالمية أقرت إنه جائحة عالمية
- وإن عدد الوفيات لفيروس كورونا في العالم عدى الـ 6000 الاف حالة وإن الاصابات عدت 170 الف حالة وده حسب آخر تحديث يوم 16 مارس 2020

للأسف يا "مي" كل دي حقايق انتي ماتكلمتيش عنها في الفيديو بتاعك واكتفيتي باللعب على مشاعر البسطاء اللي محتاجين يصدقوا أي كلام يطمنهم حتى لو ماكنش حقيقي ولا بشكل علمي.. وإنك استغليتي عوامل نفسية كتير لإقناعهم بده أولها خوفهم وقلقهم من المرض واللعب على وتر حساس زي الدين، والباسبور الأمريكي بتاعك والكام كلمة الانجليزي اللي بتقوليهم في وسط الكلام .. shame on you  يا مي!


 

Comments: