٦ طرق مبتكرة تشجع بيهم الأطفال على غسل إيدهم

16/03/2020

أهم طرق الوقاية من فيروس كورونا هي غسل الإيد كويس بالمياه والصابون على فترات كتير في اليوم لمدة 20 ثانية أو أكتر، ويمكن الأشخاص الكبار كل واحد فيهم مسؤول عن نفسه وعن صحته بس الأطفال دايما فيه حد مسؤول عنهم سواء في البيت أو المدرسة.

ويمكن للسبب ده بقى مهم جدًا إنك تعلم الأطفال اللي مسؤول عنهم طريقة غسل الإيد الصح وتشجعهم وتفهمهم السبب كمان، بس خلينا نقولك إيه الوسائل اللي ممكن تعملها عشان تسهل على طفلك إنه يغسل إيده وهي:

1- حط له كرسي صغير قدام الحوض:

لو طفلك طوله أقصر من الحوض ممكن تحط له كرسي قدام حوض الحمام عشان يقدر يعتمد على نفسه ويغسل إيده بنفسه، وياريت لو كان الكرسي ده في رجله مطاط أو سيلكون عشان مايقعش أو يتزحلق.

2- اتكلم معاه عن أضرار الجراثيم والفيروسات وإزاي ممكن تتنقل:

الأطفال مش هيبقوا مدركين بصورة كاملة إيه هي الأمراض والجراثيم والفيروسات والفرق بينهم وطرق الوقاية، فمن الأفضل إنك تكلمه عنهم بشكل أبسط أو تعمله تجارب بسيطة توصل له الفكرة، زي فيديو المدرسة "أماندا لورينزو" اللي في ميامي الأمريكية وانتشر على السوشيال ميديا وهي بتعلم الأطفال أهمية غسل الإيد بالصابون عن طريق طبق ورق وحط فيه مياه وفلفل أسود كمثال عن الفيروسات، وخلت طفل يحط صباعة في الطبق الورق، بعد كده يحط نفس الصباع في طبق فيه صابون ورجع تاني حط صباعة في الطبق الورق فاللي حصل إن الفلفل الأسود بعد على أطراف الطبق.

3- وضح لطفلك إزاي يضغط على الصابون ويستخدم المياه:

بالنسبة للأطفال الصغيرين جدًا فمن الأحسن إنك تساعدهم، بس لو كان عمرهم أكتر من 4 سنين فممكن يعتمدوا على نفسهم لكن بشوية نصايح منك خصوصا إننا مش عايزينهم يبلوا نفسهم أو هدوهم، فحاول توضح له بيستخدم الصابون إزاي وإزاي يستخدم مياه باردة منعاً للحروق من المياه السخنة، والطريقة اللي يشطف بيها إيده من الصابون لإن بالرغم إن الصابون مش مضر إنه يفضل في الإيد بس الأطفال ممكن يحطوا إيدهم في بوقهم غصب عنهم.

4- علمهم يغسلوا ايدهم مدة من 20 لـ 30 ثانية:

اقف إنت بنفسك قدامه تغسل إيدك من 20 لـ 30 ثانية، لإن الخبراء والدكاترة بيقولوا إن مدة أقل من 20 ثانية ماتقتلش جراثيم أو فيروسات، فمن الأحسن إنك تربط معاه المدة بأغنية مثلاً زي إنه يغني

 "Happy birthday to you" مرتين أو إنه يغني الحروف الأبجدية مرة.

5- علمه إن غسيل الإيد روتين:

قبل ما تسأل طفلك إنت غسلت إيدك ولا لا فمن الأحسن إنك تغسيل إيدك إنت الأول، وعلمه إنه يغسل إيده قبل الأكل وبعده، وبعد ما يستخدم اللعب لإن اللعب ممكن يكون فيها ألوان أو طباشير أو فيها تراب أو جراثيم مكان التخزين، وأول ما يدخل البيت كمان.

6- حدد له جايزة أو مكافأة لو غسل إيده باستمرار:

لو عايز تعلم طفلك أي عادة كويسة يستحسن إنك تربطها معاه في الأول بهدية أو مكافأة، وده اللي عملته مدرسة في ولاية تكساس الأمريكية بطريقة مختلفة وهي إنها طبعت للأطفال على إيدهم بختم، ولو اختفى الختم في آخر اليوم من كتر غسل إيدهم بياخدوا جايزة.

Comments: