١٢ نصيحة خلي بالك منهم لو هتشتغل من البيت

17/03/2020

الشغل من البيت مش اختيار مفضل لناس كتير لكن نظرًا للظروف الراهنة فهو الحل الأفضل والأسلم، لذلك جمعنالك شوية نصايح عشان الدنيا ما تتأزمش منك!

1- اصحى في معاد الشغل العادي ما تقولش عشان في البيت فممكن تقوم أي وقت لأن الكسل بيجيب كسل  وكده يوم هيتضرب.

2- ما تخليش الشغل مختلط بروتينك العادي بتاع اليوم يعني اغسل وشك وافطر وخلص روتينك الصباحي وبعدين ابدأ اشتغل بتركيز عشان تبقاش مشتت طول اليوم بين الشغل وبين حياتك المنزلية.

3- ما تقعدش على السرير تشتغل! خصص ركن مريح لكن يوفرلك تركيز، زي مكتب مثلًا أو ترابيزة وكرسي وادخل في مود الشغل.

4- لو بيتك هادي جدًا ممكن تشغل أي حاجة جنبك يعني تليفزيون أو موسيقى عشان الهدوء الزيادة ممكن هو كمان يخليك تسرح وما تركزش.

5- في نفس السياق لو العكس اللي حاصل وبيتك دوشة زيادة عن اللزوم يبقى خد جنب أو اقفل أوضة عليك وما تسرحش مع الناس في البيت وافتكر إنك مش في أجازة والشغل هيتراكم عليك لو نسيت نفسك.

6- اثبت حضورك في وقت الشغل وتابع الإيميلات والإشعارات في حدود ساعات العمل وبعدين وقفها.. ما تعتبرش الشغل من البيت يعني كل الوقت إنت عايش في الشغل.. حافظ على أغصابك وصحتك النفسية عشان ما تزهقش بسرعة.

7- اعمل حاجة مختلفة بعد ما تخلص شغل، اتفرج على فيلم أو كلم أصحابك تليفون أو فيديو كول عشان ما تكتأبش من قلة الكلام والخروج.

8- فهم الناس في البيت طبيعة شغلك أو التركيز اللي محتاجه وطبعًا قولهم لو هتدخل في كونفرنس كول مع الناس في الشغل عشان ماحدش يفاجئك وإنت في اجتماع أون لاين.

9- لو إنت في فيديو أو كونفرنس كول حط الهيدفونز واقفل المايك طول ما أنت مش بتتكلم عشان تقلل الأصوات والدوشة في المكالمة خصوصًا لو فيه أكتر من شخص معاك على الخط.

10- هتبقى محتاج شوية تبقى Team player حتى لو أنت في العادي بتحب تشتغل لوحدك، لكن الظروف دي محتاجة تواصل كويس مع زمايلك عشان الشغل يمشي مظبوط، وخليك فاكر أي حاجة هتبوظ إنت هتشيلها وهتضطر تعملها تاني فما تستهترش!

11- لو ليك في الرياضة أو أصلًا كنت بتروح جيم، استمر في تخصيص وقت لشوية رياضة خلال اليوم أو يوجا أو أي نشاط كنت بتعمله.

12- حدد لنفسك أوقات الراحة خلال ساعات العمل اللي هتعملها لنفسك، أكيد أنت ماكنتش بتشتغل كل الوقت وإنت في المكتب، لكن خليك فاكر ما تسرحش عشان الموضوع ما يقلبش كابوس!


 

Comments: