في 7 خطوات دليلك الشامل عشان تتلاشى خناقات البيت 

18/03/2020

بسبب زيادة أعداد المصابين في مصر بفيروس كورونا أغلب الناس والشركات بدأت تحاول تفعل قرار الشغل من البيت أو تقليل كثافة الموظفين فبالتالي بقى أغلب الناس يشتغلوا من بيوتهم وده هيستمر لمدة أسبوعين تقريبا أو أكتر لسة محدش عارف.

وفي الحالة دي كل فرد مننا بيقعد في البيت بيكتشف أهله خصوصًا إن الجامعات والمدارس كمان أجازة، فأغلب الناس قاعدة في بيوتها، وده اللي بيزود الخلافات اليومية اللي كانت بتحصل مرة في الأسبوع واللي بتكون يوم الجمعة بس فهتتحول من أسبوعية إلى يومية لحد ما نعرف نتصرف مع فيروس كورونا.

وبالتالي خلينا نقولك ممكن تتصرف إزاي الأسبوعين أو أكتر اللي هتقعدهم في البيت من غير خناقات أو مشاكل مع أهلك:

1- قيّم الموضوع اللي هتتكلم فيه:

قبل ما تتكلم مع أهلك وإنت قاعد في البيت قرر هل الموضوع اللي إنت هتتكلم فيه يستحق الجدال والخناق اللي ممكن يوصل له الموضوع؟ وممكن تسأل نفسك إنت ليه بتتجنب الجدال معاهم؟ لإنك لما هتجاوب على السؤال ده هيفكرك قبل ما تدخل معاهم في جدالات مالهاش فايدة غير لتسلية الفراغ.

2- اقطع المحادثة لو مش قادر تكمل كلام:

مش معنى الكلام إنك تكون وقح أو قليل الأدب لكن المقصود إنك ترد بإجابات قصيرة ماتسمحش إن يتم فتح كلام أكتر، ولو مش عايز تعمل حاجة ممكن تعترض عليها بس بأدب، بس ممكن تكسر القاعدة دي لو الكلام هيبقى لطيف ومش هيضر أي طرف فيكوا.

3- احتفظ بشوية وقت لنفسك:

اقعد في أوضتك لوحدك وحاول تستمتع بشوية خصوصية في اليوم، تعمل فيهم أي حاجة لوحدك زي إنك تكلم حد أو تتفرج على حاجة أو تقعد مع نفسك تريح دماغك، بس قولهم ده عشان محدش يفهم إنك مش حابب تقعد معاهم، إنت بس عايز شوية مساحة وخصوصية.

4- خلى عندك أنشطة تعملها في خلال يومك:

مش لازم طول النهار تبقى بتتفرج على التلفزيون أو بتلعب في موبايلك بس لإن الأنشطة دي ممكن تتعمل وإنت قاعد مع ناس عادي أو مع عيلتك بالأخص، بس خلى عندك أنشطة أو وسائل ترفيه تسمحلك إن يبقى عندك وقت لنفسك زي إنك تقرأ كتاب، أو تاخد كورس أونلاين.

5- خليك حساس شوية: 

خليك عارف إن أهلك كل ما بيكبروا في السن هما اللي بيكونوا حساسين زيادة، عشان كده خليك صبور معاهم ولطيف على قد ما تقدر مش لازم تكبر دايما الكلام أو تقلب بخناقة خصوصًا لو كان الموضوع بسيط زي عادات غذائية أو لبس مذيع في التلفزيون.

6- خليك لطيف على قد ما تقدر:

افتكر إن كل حاجة بتتغير وإن أي مشاكل بينك وبين أهلك زمان ممكن تعدي بسهولة، وإن الوقت قادر يخليك تتخطى عقوبات وإن علاقتك بأهلك هي علاقة دم مش زي علاقتك بصحابك أو بشريكك فصعب تستغنى عنهم.

7- استغل قعدة البيت في تصليح علاقتك بأهلك:

خلى عندك نية إنك تفتح معاهم حوارات ونقاشات سلمية من غير ما حد يضايق التاني أو يضغط عليه، اعمل كده طبعا وبكده تبقى ضربت عصفورين بحجر منك حميت نفسك من الكورونا ومنك صلحت علاقاتك العائلية بدل ما كانت تفضل بايظة.

Comments: