إزاي تقلل الضغط النفسي عليك في زمن الكورونا؟

18/03/2020

الأجواء المحيطة بتحمل قدر كبير من الكئابة، والأخبار مستمرة بلا توقف من كل مكان في العالم، وطبعًا متابعة سير الأمور في ظروف زي دي واجب، لكن لصحتك النفسية عليك حق! عشان ما تنهارش وما تزهقش خصوصًا بعد قرارات التزام البيوت وتقضيتنا وقت طويل مع نفسنا أو احنا والأخبار!

عشان كده جمعنالك شوية اقتراحات ونصايح يمكن تنفع في الأوقات دي.

1- حاول تسيطر على متابعتك للأخبار وده هيتحتاج إنك ما تفتحش سوشيال ميديا باستمرار لأن هي مصدر أساسي لتدوال الأخبار والإشاعات.

2- بمناسبة الإشاعات، مهم جدًا تخلي بالك من مصدر الخبر اللي بتقراه، وتتأكد من أكتر من مكان، ما تسحلش نفسك قبل ما تعرف أصل الموضوع وتفاصيله.

3- ارجع لمنطقتك الآمنة، المسلسلات والأفلام اللي بتحبها وكنت بتشوفها وإنت صغير، يعني تشغل "لن أعيش في جلباب أبي" وتسرح مع خمس ست عشر حلقات كده وبعدين ترجع تشوف الدنيا حصل فيها إيه!

4- اعمل unfollow لمثيرين الذعر ومروجين الإشاعات، الناس اللي بتندب طول الوقت أو بتزعق طول الوقت، مالهمش لزوم، إنت متابع وعارف اللي بيحصل، سلبيتهم مش هتضيفلك حاجة.

5- تواصل مع أصحابك ومش لازم تفضل تتكلم عن الوباء والناس اللي ماتت، ما تتجاهلش الأحداث أكيد بس ما تسرحش معاها، واتكلم في أي حاجة تانية.

6- افتح فيديوهات أون لاين لرياضة أو يوجا وجرب تعمل كده في البيت.

7- ممكن بردو تجرب الكورسات أون لاين وتستغل الوقت ده إنك تتعلم حاجة جديدة وده هيحسن نفسيتك جدًا.

8- في فيلم "Eat, Pray, Love" خلال رحلة البطلة الأمريكية لإيطاليا كانوا بيقولوها هناك إن الإيطاليين بيقدروا يستمتعوا بحياتهم لأنهم عارفين "متعة ألا تفعل شيء"، ما تكدرش نفسك بالتفكير في الحاجات اللي مش عارف تعملها واستمتع بعدم فعل شيء وقعدتك في البيت مرتاح وماوراكش حاجة وبتنام كويس.

9- أكيد عندك حاجات كتير كنت شايلها "لما تفضى" زي ترتيب حاجتك أو كتب عايز تقراها أو طبخة عايز تجربها.. أعتقد الوقت جه للطلعة دي.

10- الأكل.. مش محتاجين شرح كتير بس إنت دلوقتي في موقف إن عندك وقت كتير وبال، ممكن تبطخ أو تطلب من أسرتك أكل مختلف وتساعدهم في عمله، حقًا وصدقًا الأكل ممكن يبقى متعة كبيرة في القاعدة دي!

Comments: