علاج فيروس كورونا.. ما بين الموقف الرسمي والأخبار المنتشرة.. الحقيقة فين؟!

18/03/2020

كتب: محمد إنسان

زي ما عودناكم في "ّذا جلوكال" إننا نحاول نوضح حقيقة أي خبر أو معلومة بتنتشر الأيام دي ومدى صحتها، خصوصّا إن العالم كله دلوقتي بقى عبارة عن أرض خصبة للإشاعات.. هنتكلم دلوقتي عن أخبار انتشرت في الساعات الأخيرة عن اكتشاف علاج لفيروس كورونا في أكتر من بلد.

ايه اللي بيحصل؟ وياترى الأخبار دي حقيقة ولا لا؟

في البداية خالص من أول إعلان المرض منظمة الصحة العالمية أكدت إنه مرض لم يُكتشف له علاج حتى الآن.
طيب هل الكلام ده اتغيّر؟ هل ظهر علاج لفيروس كورونا المستجد المعرّف علميًا بـ "كوفيد-19" ؟ هل منظمة الصحة العالمية أعلنت حاجة؟ تعالوا نشوف الموقف حتى الآن..

- نبدأ بـ "الصين" اللي أقرت أول استخدام للقاح تطورته ضد الفيروس وعملت له "تجارب سريرية" وده كان بتاريخ الثلاثاء 17/3 .. ولحد دلوقتي في انتظار النتائج الرسمية.

- سبق الصين في استخدام لقاح تجريبي "أمريكا" اللي طبقت بالفعل تجربة بشرية وأدت لعدد من المتطوعين جرعات من اللقاح التجريبي اللي نجحت في تطويره، وقالت إن الموضوع محتاج عدة أشهر لمتابعة النتائج.

- كمان المانيا شغالة على تطوير للقاح ضد كورونا من خلال شركة CureVac الألمانية للتكنولوجيا الحيوية وداخلة في معركة كبيرة مع ترامب عشان تقارير كتير قالت إنه بيحاول يشتري الأبحاث الألمانية بشكل حصري!

- أخر دولة وأخر اعلان عن علاج لكورونا كانت "فرنسا" واللي ظهر خبر منها امبارح انتشر بشكل كبير على السوشيال ميديا بيقول إن شركة عرض أول علاج لفيروس كورونا وهنتنتج منه كمية تكفي لعلاج 300 ألف مصاب حول العالم.
 

لحد دلوقتي هي دي التجارب العملية والتصريحات الرسمية والأخبار الحقيقية اللي ظهرت لموضوع علاج كورونا، واخرهم كان من دقايق قليلة خبر لترامب بيقول فيه إن النهاردة هيعلن عن أنباء مهمة من إدارة الدواء في الولايات المتحدة بشأن كورونا


طيب بعد ده كله، ايه موقف منظمة الصحة العالمية والتصريحات الرسمية في موضوع علاج فيروس كورونا؟
 

- المنظمة وفي أخر تصريح رسمي ليها أكدت إن لحد دلوقتي مفيش علاج رسمي معتمد منها لعلاج كورونا.. وده معناه إن كل اللي عرضناه فوق ده هو محاولات من العالم كله لإيجاد علاج حقيقي لكورونا ولكن يبقى تحت بند المحاولة ومازلنا جميعًا منتظرين!.







 

Comments: