١٦ عرض بيشجعوا الناس على قعدة البيت: كورسات مجانية وحفلات لايف

18/03/2020

أكتر قرار صح ممكن تاخده الفترة دي هو إنك تلتزم بيتك وماتخرجش عشان تحمي نفسك من فيروس كورونا عشان ماتختطلتش بحد مصاب وبالتالي ماتاخدش المرض ولا تنقله.

يمكن كلنا متفقين على مدى صحة الخطوة دي وعلى استمرارها على الأقل لمدة 14 يوم بس في نفس عارفين إننا هنعاني من ملل وزهق واكتئاب لإننا حتى مش هنقدر نخرج أو نقعد في تجمعات أو نشوف صحابنا.

بس فيه أماكن وأشخاص كتير حاولوا يشجعوا الناس على قعدة البيت عن طريق تقديم خدماتهم "أونلاين"، حاولنا نجمعلك إيه هما الحاجات دي عشان تسلي قعدتك في البيت وهما:

1- موقع "Coursera" أعلن عن كورسات مجانية:

موقع "Coursera" أعلن يوم الخميس 12 مارس 2020 إنه هيقدم كورسات مجانية لإن فيه جامعات كتير قفلت بسبب فيروس كورونا واعداد كتير من الطلبة قعدوا في البيت وقالوا إن العرض ده هيستمر لحد 31 يوليو.

2-وزارة الاتصالات أعلنت عن زيادة 20% في سعات التحميل:

بسبب قرار تعليق الدراسة أعلنت وزارة الأتصالات إنهم هيزودوا سعات التحميل الشهرية للإنترنت المنزلي للأفراد بنسبة 20% بهدف دعم التعليم عن بعد لإن تم تعليق المدارس والجامعات، وهيتم توفير منصات أونلاين عشان تستضيف المواد التعليمية للطلبة في المدارس والجامعات.

3- أبلكيشن "شازلونج" هيقدم 150 ألف جلسة مجانية:

بسبب الظروف اللي العالم بيواجها عشان القلق والذعر بسبب فيروس كورونا قرر أبلكيشن "شازلونج" إنه يقدم 150 ألف جلسة مجانية عشان الصحة النفسية عامل أساسي بيدعم الصحة العالمية.

4- فرقة مسار إجباري:

أعلنوا مسار إجباري عن حفلة هتكون لايف على قناتهم على اليوتيوب هتكون يوم الجمعة 20 مارس الساعة 10 بليل عشان يشجعوا الناس على قعدة البيت.

5- عزيز مرقة:

أعلن برضه إنه هيعمل حفلة لايف على صفحته الرسمية على الفيسبوك وهتكون يوم 20 مارس الساعة 7 مساءاُ.

6- أبلكيشن "أنغامي":

أعلن أبلكيشن "أنغامي" إن كل يوم الساعة 7 مساءاً على صفحتهم الرسمية على انستجرام هيكون فيه فنان جديد هيغني.

7- تامر عاشور:

قال في تويت له الأكونت الرسمي بتاعه على تويتر إنه هيعمل حفلة لايف على اليوتيوب وإن الناس تقدر تطلب كمان الأغاني اللي هي عايزاها.

8- Room art space:

أعلنوا إن هيكون فيه حفلة لايف كل يوم مع فنان مختلف على صفحتهم على الفيسبوك وإن الحفلات هتبدأ من الساعة 10 بليل.

9- سينما زاوية:

أعلنت سينما زاوية إنهم هيعلقوا نشاطهم من يوم 15 مارس وهتوفر أفلام على موقع "Vimeo" عشان الناس تتفرج عليها من البيت وإن الفيلم هيكون موجود ببلاش على الموقع لمدة أسبوع وهينزل على صفحة زاوية على الفيسبوك وانستجرام.

10- أبليكيشن "الكوتش":

أبليكيشن "الكوتش" أعلن إنك بتدخل عليه برومو كود "StaySafe"  لما تنزل الأبلكيشن وهتتمرن في البيت وتتابع مع مدربين ومتخصصين تغذية مجاناً لمدة شهر.

11- نتفليكس أعلنت عن خدمة جديدة للـ Movie Nights عن بعد:

اعلنت شركة نتفليكس إن بالتعاون مع Google chrome ممكن تتفرج على الأفلام والمسلسلات مع صحابك في نفس الوقت، وهيكون فيه Chat rooms عشان تقدر إنت وصحابك تشاركوا ردود الأفعال مع بعض وده بسبب انتشار فيروس كورونا وعدم قدرة الناس على إنهم يخرجوا مع بعض.

12- متحف الفاتيكان في روما:

إيطاليا من أكتر الدول اللي فيها حالات إصابة بكورونا وعشان كده يمكن البلد كلها قافلة، فمن خلال موقع متاحف الفاتيكان تقدر تشوف المتاحف كلها أونلاين.

13- متحف أورساي في باريس:

أعلن برضه متحف أورساي إنك ممكن تاخد جولة في المتحف أونلاين وإنت قاعد في البيت، المتحف كان عبار عن محطة سكة حديد في الأول واتحول لمتحف فيه منحوتات ولوح كتير وأشهرهم لوحه لفان جوخ وكلود مونيه.

14- متحف فان جوخ في أمستردام:

متحف فان جوخ فيه حوالي 500 لوحة لفان جوخ وفيه لوحات تانية لفنانيين عاشوا في الوقت بتاعه، فممكن برضه تتفرج على المتحف ده دلوقتي أونلاين.

15- متحف اللوفر في باريس:

ممكن تستغل الفرصة دي إنك تتفرج على الأثار الفرعونية اللي في المتحف لو ماعرفتش قبل كده تسافرله، ده غير إنك ممكن تدوس على أي قطعة أثار عشان تعرف تاريخها.

16- متحف التاريخ الطبيعي في لندن:

ممكن برضه تتفرج على متحف التاريخ الطبيعي أونلاين، وهو متحف فيه 80 مليون عينة من أحياء منقرضة وأحياء لسه مش من منقرضة من نباتات وحشرات وطبقات أرض ومعادن، ده غير متاحف كتير ممكن تتفرج عليها أونلاين وإنت قاعد في البيت الفترة دي زي المتحف البريطاني في لندن ،ومتحف الفن الحديث في نيويورك، والمتحف الوطني للأنثروبولوجيا في المكسيك، ومتحف ريكز في أمستردام والمعرض الوطني للفنون في واشنطن

Comments: