٧ حاجات ممكن تعملها عشان تحسن مناعتك

19/03/2020

في وسط زحمة الأخبار اللي بتطلع كل دقيقة عن فيروس "كورونا"وطرق الوقاية والاحتياطات اللي كلنا بنحاول نطبقها عشان نحمي نفسنا من الإصابة، وبين الاختراعات والهبد أحياناً الموجود على السوشيال ميديا وفي كل حتة

دي  نصايح مثبتة علمياً عشان تقدر تزود مناعتك  مش عشان الكورونا تحديداً.. بس عشان صحتك في العموم
1- النوم لفترة كفاية
يعني متنامش أقل من 7 ساعات يومياً،  لأن قلة النوم بتسبب زيادة مستويات هرمون التّوتر في جسم الإنسان، وتزيد من نسبة الإصابة بالالتهابات وبالتالي بيصبح عرضة بنسبة أكبر للمرض

2- الضحك
آه والله زي ما بنقولك كده! الضحك بيحفز إنتاج خلايا الدم البيضاء، واللي وظيفتها الرئيسية هي الدفاع عن الجسم ومكافحة العدوى والأمراض المختلفة

3- فيتامين C

إن نظامك الغذائي يبقى فيه نسبة كافية من فيتامين C، واللي متوفر في حاجات زي "البرتقال، الخضروات الورقية، الكيوي، البروكلي، الجوافة والفلفل الأحمر"

4- وقف التدخين

لو إنت مدخن أو بتقعد في دخان لفترة طويلة حاول تتجنب ده لأن التدخين بيدمر الأجسام المضادة اللي بتحارب أي مرض بيهاجم الجسم، دي رسالة للمدخنين
اعتبروا إن دي فرصة عشان تحاولوا تبطلوا أو عالأقل تقللوا

5- اتعرض للشمس

من الفيتامينات المهمة لدعم الجهاز المناعي هو فيتامين د، واللي  من أهم مصادره هو التعرض للشمس، فبننصحك تتعرض للشمس لمدة تترواح بين 5 ل 20 دقيقة يومياً

6- التوتر والضغط العصبي

لما بتتعرض لتوتر أو قلق جسمك تلقائي بينتج كميات كبيرة من هرمون التوتر "الكورتيزول"، واللي بيقلل من فرص عمل جهاز المناعة بكفاءة، يعني القلق والوسوسة الزيادة زي اللي في جروبات "الماميز دي" دي بتضر ما مابتنفعش والله!

7- التغذية الجيدة

لازم تاكل كويس وأكل مفيد، وتواظب على حاجات زي البرتقال بالجزر والعسل الأبيض حسب تصريحات وزارة الصحة.

Comments: