كلام في الترجمة: الأصم ممكن يستمتع بالموسيقى.. 7 حاجات لازم تعرفها عن لغة الإشارة

19/03/2020

البديهيات والمسلمات في حياتنا بتخلينا ما نفكرش لو ما كانتش موجودة كنا عملنا إيه؟ لو كان مفيش طريقة نتواصل بيها مع بعض؟ كونك بتملك صوت ده مش معناه إن إنك هتكون مفهوم، عشان كده اختراع فكرة اللغة كان من أهم تطورات البشرية، لأن حركة الإيد ممكن تكون لغة، تجميع أصوات معينة جنب بعض تتفق معاك المجموعة اللي حواليك على معناها ممكن يكون لغة، النظرات أحيانًا ممكن تبقى لغة، عشان كده الترجمة فكرة إنسانية كبيرة قبل ما تكون وظيفة ثقافية أو دبلوماسية، والمترجم ممكن أحيانًا يبقى الشاعر أو المؤلف أو اللي بيحول مشاعرك لكلمات زي ما بيكون الشخص اللي فاهم المقابل لكلماتك في لغة تانية ممكن يكون إيه.

لغة الإشارة للتعامل مع الصم والبكم من أهم مراحل التعبير اللي قدر يوصلها الإنسان، لأنها بتوصل شخص فقد حاسة السمع أو القدرة على الكلام إنه يعيش بشكل سوي بين مجتمع بيقدر يتواصل بشكل مختلف عنه، لكن بالنسبة لناس كتير اللغة دي بيعرفها المتخصصين بس ولو اتحط في موقف يا إما مش هيعرف يساعد شخص محتاج أو مش هيعرف هو يوصله اللي محتاجه.

في إطار ملف "ذا جلوكال" عن الترجمة والتواصل، جمعنا أهم معلومات محتاج تعرفها عن لغة الإشارة عشان يبقى عندك الحد الأدنى من المعرفة اللي يخليك تتعامل مع اللغة دي أما تحتاج، زي ما طرحها موقع "The Odyssey Online".

1- لغة الإشارة بتختلف بين كل بلد والتانية، فيه أكتر من 300 لغة إشارة على مستوى العالم، أشهرهم "لغة الإشارة الأمريكية"، وفي مختلف أنحاء العالم فيه أكتر من 70 مليون شخص لغتهم الأولى هي الإشارة، وزي اللغات المنطوقة، اتطورت لغة الإشارة مع الوقت وتطور الكلمات والأساليب والمعاني.

2- لغة الإشارة مش تمثيل للحروف المنطوقة، زي ما قولنا إنها بتختلف بين كل بلد والتانية، لكن بردو ده مش معناه إن الحركة مرتبطة بإنها تعكس معنى الكلمة في لغة الدولة المنطوقة أو شكل الحرف، والفصل ده مفيد عشان يسهل التواصل بين لغات الإشارة المختلفة في أنحاء العالم.

3- في نفس سياق النقطة اللي فاتت، لغة الإشارة في أي بلد بردو مالهاش علاقة بقواعد اللغة بتاعتها، مثلاً اللغة الأمريكية مفيهاش نفس أفعال الإنجليزي وتصريفاته، ومفيهاش نفس بناء الجملة، يعني عادة بتنتهي الجملة الإنجليزية بالمواعيد زي بكرة أو امبارح، لكن في لغة الإشارة بتبدأ بيها وبنقول "بكرة هعمل كذا..".

4- لغة الإشارة مش مجرد لغة بيتعبر عنها بالإيد، ضروري تستخدم فيها كل جسمك، زي مهنة الممثل بالظبط، لو بتقول "بحبك" وإنت تقصد العكس جمهورك هيفهم ده من أدائك، مهم جدًا تستخدم تعبيرات وشك ولغة الجسد.

5- الإصابة في المخ بأي شكل بتأثر على قدرة الشخص اللي بيستخدم لغة الإشارة حتى لو إيده مش مصابة، لكن دي طريقة الأصم أو الأبكم الوحيدة للتواصل والتعبير عن نفسه فأي إصابة من النوع ده بتأثر عليها بشكل كبير، ده ممكن يخليك تقدر الموقف وتكون أكثر صبر لو اتعاملت مع حالة مشابهة.

6- الناس اللي بتستخدم لغة الإشارة أيا كانت حالتهم أو سبب استخدامهم ليها إيه، هما ناس يقدروا يعملوا أي حاجة إنت تقدر تعملها، وأكبر غلط بيحصل من ناس كتير هو إنهم بيتعاملوا معاهم كحالات خاصة أو كأشخاص متأخرين مش فاهمينهم، لكن الحقيقة إنهم عندهم قدرة على مناقشة العلوم وفهمها والسواقة وإنهم يحكوا حكايات أو حتى نكت، لكن هما عندهم طريقة خاصة بيهم، واللي نسبة لتواجدها في العالم وأعدادهم لازم يتم احترامها وتعميم فهم الناس لها والتعامل بيها.

7- لغة الإشارة أصبحت مؤخرًا جزء مهم من الأعمال الفنية والثقافية اللي بقة دايمًا ملحقة بمترجم مختص فيها، بجانب إن كان فيه أعمال فنية كاملة قام بيها أبطال من المتحدثين بلغة الإشارة زي فيلم "Deafula" اللي كان عن فيلم "دراكولا" بس كان كله بلغة الإشارة الأمريكية مع تعليق صوتي للناس اللي مش فاهمة، بجانب مسرحية موسيقية اسمها "صحوة الربيع" اتعرضت على مسرح "برودواي"، بتحكي عن طلبة في مدرسة ألمانية عندهم مشاكل في السمع وقام بالتمثيل فيها ناس بالفعل من أصحاب الحالة دي ولاقت نجاح كبير، وده بيثبت إن رغم صعوبة تخيل إن الشخص الأصم يقدر يستوعب الموسيقى أو الرقص إلا إنه حصل بالفعل.

Comments: