مائة عام من " هو إحنا إيه بالنسبة لبعض؟" 

19/03/2020

بما إننا قاعدين شوية في البيت فده بيبقى الوقت المناسب  للتفكير فكل الحاجات اللي بنحاول نغلوش عليها في الأيام العادية، حاجة من الحاجات دي هي العلاقات غير المحددة أو الـ Undefined Relationships واللي بتتلخص في سؤال "هو إحنا إيه بقى" ؟؟
تقريباً معظمنا عدى بالمرحلة دي ده عالأقل مرة ده لو كان محظوظ يعني في علاقاته اللي هو العلاقة بتبقى undefined إحنا لا صحاب ولا مرتبطين ولا اخوات.. أمال احنا إيه ؟

إنت بتعرف بجد إنك في undefined realatiopnship لما تلاقي نفسك مش قادر تجاوب عالسؤال ده!

بس أولاً ليه ممكن ده يحصل؟
احتياج الشخص إنه مايكونش لوحده بيخليه ساعات يسعى لوجود شخص في حياته، بأي شكل ومش بيبقى محدد الشكل ده إيه، ولا بيحاول يحدد إذا كان كل اللي فارق معاه إنه يسد احتياج وخللاص ولا إيه!

خانة الاستبن:
وده بيبقى استغلال لشخص إنت عارف إن عنده تجاهك مشاعر فالبتالي بتسحله معاك لو انت عندك فراغ عاطفي وبعدين لما تستقر، هوب تبعد حاجة كده زي "خد ياض.. خلاص روح ياض" فتفضل العلاقة دايماً متعلقة ومش محددة.

الاستخسار:
وده بيبقى نفس فكرة الاستبن، بس هو شخص انت شايفه مناسب ليك بالعقل، بس إنت مش مستعد تدخل في علاقة حالياً أو عندك أولويات تانية غير الارتباط، بس في نفس الوقت لما هتاخد القرار ده هيكون الشخص ده هو اختيارك، فإنت بتفضل سايبه كده لا على حامي ولا على بارد، عشان مستخسر تقوله لأ فيشوف حد تاني ويحبه، ومابتقولوش آه عشان متبقاش ألزمت نفسك بحاجة.

علاقة موسمية:
ودي المرتبطة بالمواسم، يعني زي علاقة الصيف عشان الخروجات، أو علاقة الشتا عشان الهرمونات، علاقة  مع شخص معاك في الشغل أو الجامعة او أي مكان انت موجود فيه، أو العلاقة المرتبطة بحاجات أو أنشطة انت متعود تعملها في أوقات معينة، ودي علاقة بتبدأ وبتخلص بانتهاء الموسم بتاعها أو انك تتنقل لمكان أو نشاط جديد.

زي ما قلنالك في الأول أديك عندك وقت طويل للتفكير في البيت،مفيش خروجات ولا مولات ولا أي حتة تروحها… فقلب بقى الكلمتين دول في دماغك.. ولو اكتشفت انك في Undefined Relationship.. يا تحاول تحط إطار أو شكل للعلاقة.. يا تنهي العلاقة.. العمر مش بعزقة! 

Comments: