٨ حاجات خلي بالك منهم وإنت قاعد في البيت

22/03/2020

اتكلمنا كتير عن قاعدة البيت واقترحنا حاجات لطيفة لتخفيف حدة الملل، وقولنا قد إيه الموضوع المهم للخروج من الأزمة الحالية، لكن على جانب تاني، التحذير كمان من الأضرار مهم، عشان كده جمعنالك شوية نقط خلي بالك منها!

1- مقدرين إن الأكل شيء مسلي، وطلب الأكل من برة ممكن يعوضك شوية إنك مش بتخرج تروح المطاعم اللي بتحبها، لكن محتاج تفتكر إنك مش أكتر اختيار آمن صحيًا، وإنك مش عايز تخرج من العزلة دي زايد عشرين كيلو، ومخلص فلوسك ومديون!

2-محبي الشوبينج والشراء، برجاء التزام ضبط النفس، وكفاية أوردرات أون لاين! مش منطقي تصرفوا وإنتوا جوه في البيت في عزلة تامة أكتر من اللي بتصرفوه في يومكم الطبيعي! 

3- بغض النظر عن الأكل من برة، لكن محتاج تراعي إن حركتك بقة قليل، وحرقك قليل، فما تزودهاش في الأكل اللي بدون حركة عشان وزنك ما يزيدش، التزم بأكل صحي، أو كميات معقولة من أكلك العادي، ولو ممكن تلعب شوية رياضة يبقى كويس.

4- بلاش نعمل abuse للإنترنت عشان النتيجة ما تبقاش إنه يقف أو يبقى بطيء علينا كلنا، طبعًا هو التسلية الوحيدة، وهو وسيلة العمل، لكن المقصود إن مثلًا ما تشغلش أفلام ومسلسلات وإنت مش قاعد قدامها، ومش لازم تتفرج بأفضل كواليتي، وابدأ اكتشف التليفزيون بيقول إيه، او اتجه للقراية.

5- نفس الشيء لبقية موارد وخدمات البيت، ما تستهلكش أي حاجة زيادة عن اللزوم وخليك فاكر إن كل الناس في البيت زيك وإن زيادة الضغط هتؤدي إن الخدمة دي تقف وتبوظ.

6- الملل والضغط عند ناس كتير بيسبب عصبية وسخافة في أسلوبك العام، ما تستسلمش لده، وما تخليش الناس اللي معاك في البيت تنزعج من قاعدة البيت.

7- الوحدة وقلة الكلام هتعملك "هسهس"، ما تسيبش نفسك ليها، اتكلم مع عيلتك أو أصحابك، استخدم الفيديو كول، التليفون، الشات، بس مش لازم تقعد مع نفسك طول الوقت.

8- أخيرًا وليس آخرًا التنويه اليومي والشائع عن إنك مش لوحدك في الدنيا، ما تحتكرش أي منتج سواء غذائي أو صحي، وادي فرصة لغيرك يشتري زيك.

Comments: