٨ أخبار مالهمش لازمة لو عايز تفصل عن أخبار الكورونا

22/03/2020

1- القبض على أربع شباب في المقطم عشان كانوا بيصوروا فيديوهات وهما بيعملوا مقالب في الناس في الشارع ويوقعوهم على الأرض وبينزلوها على "تيك توك" عشان يجيبوا مشاهدات عالية.

2- فيه خلاف في مسلسل "دهب عيرة" من بطولة يسرا اللي هيتعرض في رمضان الجاي لو ربنا كتبلنا عمر، والخلاف بين حلا شيحة وعبير صبري وجومانة مراد على مين فيهم هيبقى تاني اسم بعد "يسرا".

3- سامي قمصان المدرب المساعد لفريق الأهلي أعلن في تصريح لقناة الأهلي إنه قبل مايجي الأهلي جاله عرض من الزمالك لكنه رفضه.

3- حصلت وصلة ردح بين ريهام حجاج وبين معجبة عندها على انستجرام كتبتلها كومنت بتقولها فيه "‏ما انتي حلوة أهو إيه اللي رماكي على كار ‏خطف الرجالة"، ريهام تسكت؟ لأ طبعاً ردت عليها بكومنت بتقولها فيه: "ما انتي فاكرة نفسك لذيذة أهو وانتي في الحقيقة بنج، والله لو الرجالة اللي بتعرفيهم هفأ ‏وبيتخطفوا يبقى أنتي معرفتيش رجالة، قلبي معاكي"

4- خبراء الأرصاد الجوية بيتوقعوا إن بكرة "الاتنين" هيبقى فيه رياح نشيطة فيها رمال واحتمال الدنيا تمطر.

5- محمد رمضان احتفل على إنستجرام بإن أغنية "الملك" بتاعته وصلت 120 مليون مشاهدة على يوتيوب.

6- خناقة بين الممثلتين التركيتين "بيرين سات" و"توبا بويكستون" عشان "توبا" قالت على "بيرين" إنها جريئة وبتعمل مشاهد حميمية ماتقدرش توبا إنها تعملها.

7- كشفت تقارير في الصحفة الإنجليزية إن نادي مانشتسر يونايتد بيفكر يتخلى عن اللاعبين جيسي لينغارد وأندرياس بيريرا.

8- هجوم على الفنانة السورية "سارة فرح" خريجة ستار أكاديمي عشان عملت فوتوسيشن جديد في البانيو والناس هاجموا الشكل اللي ظهرت بيه.

وبكده تكون انتهت نشرة الاخبار اللي مالهاش لازمة النهارده أتمنى تكونوا ماستفادتوش حاجة فعلاً زي ماحنا قاصدين بس على الأقل تكونوا فصلتوا شوية عن أخبار الكورونا اللي في كل حتة دي.


 

Comments: