إزاي الحجر الصحي ممكن يبقى صحي فعلًا لعلاقاتك؟

25/03/2020

المثل بيقولك "يوم الامتحان يكرم المرء أو يهان"، ويوم الحجر الصحي وحظر التجول، والعزل الاجباري للناس عن بعضها بيبان العلاقات الحقيقية من العلاقات الأي كلام، وده مش بس على العلاقات العاطفية والمرتبطين، لكن حتى على الصداقات والزمالة، بس خلينا النهاردة مركزين في العلاقات العاطفية، ونحاول نوضح إزاي الحجر الصحي ممكن يبقى مفيد لارتباطك ويبينلك الحقيقي من الفالصو؟!

1- عدم وجود مقابلات ولا خروجات ولا سينما، يعني مفيش حل غير إنكوا تتكلموا مع بعض! سواء كتابة بقى أو فيديو كول أو تليفون، الفكرة إن مفيش حاجة تضيع فيها الوقت، وهنا هيبقى اختبار حقيقي لمدة معرفتكوا ببعض أو قدرتكوا على التواصل مع بعض.

2- البُعد الإجباري لازم بتتولد معاه الأشواق، بس إحنا ناس كبار ممكن نتعدى الجزء الطفولي ده ونفكر بجد، هل الشخص ده واحشني فعلًا؟ هل أنا مفتقد أعمل معاه أي حاجة؟ لو ما افتقدتش شريكك بالشكل المتناسب مع إنه شريك عاطفي مش مجرد شخص بيضيعلك وقتك فأنت في مشكلة!

3- الأيام دي لا بنشتري حاجات من برة ولا بنروح سينمات ولا بنعمل مفاجآت يعني الرومانسية في أجازة لحد ما الحجر يخلص، فده وقت مناسب إنكوا تطوروا روح الصداقة بينكوا، تتعلموا تتكلم في أمور الدنيا، تلعبوا، تسألوا بعض، تقولوا نكت، تتبادلوا آراء..إلخ.

4- ده أيضًا وقت مناسب للاعترافات، لو بتتكلموا عبر وسائل التواصل أو التليفون فخلينا نقول الخطر على حياتك قليل أو معدوم، والفرصة في العزل كبيرة إن الواحد يتعصب ويهدى ويعيد تفكير ويكون رأي محترم، فممكن تتبادلوا الاعترافات كده ومش لازم يبقى بجرايم، بس عادي ممكن بأفكار بمشاعر بحاجات مستخبية ما اتقالتش.

5-تقييم العلاقة، جملة كليشيه آه، بس للأسف شيء حقيقي وضروري، ووجود فسحة من الوقت هتخليها اللحظة المناسبة لده، خصوصًا لو بقالكوا مدة بتحاولوا تاخد مساحتكوا عشان تفكروا ومش بتقدروا، أهه المساحة جت إجبارية.

6- خلينا لا ننسى الناس اللي على البر، واللي يدوب بتكراش على حد، لو فيه قبول مبدئي، فده أنسب وقت تطور العلاقة، الوقت الفاضي كتير والناس قاعدة في البيت، افتح كلام، ابعت أغنية واتكلم عنها، العبوا أسئلة، اتصرفوا يعني وما تضيعوش الفرصة.

Comments: