بعد وفاة أم بـ "خليط مطهرات منزلي" إزاي تحمي نفسك وإيه المواد اللي ما ينفعش تتخلط ببعض؟

25/03/2020

شهدت منطقة أوسيم في الجيزة حادث مروع، راح ضحيته أم واتسمم زوجها وتلاتة من أولادها، نتيجة هوس التنضيف والتطهير اللي أصاب البيوت في الوقت الأخير لمقاومة فيروس كورونا.

وفاة الأم وتسمم بقية الأسرة حصل نتيجة تسرب غاز سام في البيت، واللي مصدره خليط كيميائي عملته الأم لتنضيف البيت، والمواد الواضحة فيه حتى الآن هي إنها استخدمت "كلور" و"مية نار" فكانت النتيجة غاز سام تسبب في اختناق الموجودين.

تم نقل المصابين للمستشفى، وإصدار أمر بتشريح الجثة، ومن ناحية تانية أمرت جهات التحقيق بالتحفظ على المواد الكيميائية اللي صنعتها ربة البيت، وإرسالها للمعمل الجنائي لفحصها وكتابة تقرير عنها.

في نفس السياق حذر خبراء من خلط المطهرات أو أي مواد كيميائية ببعضها، بالإضافة لوجوب الابتعاد عن أي مواد مجهولة المصدر، والالتزام بالماركات والشركات المعروفة، واللجوء للمتخصصين في حالة الاحتياج للسؤال عن أي حالة زي دي.

عشان كده جمعنا شوية نصايح لازم تخلي بالك منها في التعامل مع المنظفات:

1- لازم تبعد المنظفات والمطهرات تمامًا عن الأطفال وخليها في مكان عالي ومقفول عليها كويس.

2- ممنوع تمامًا خلط مواد التنضيف وخصوصًا الأحماض ومواد التبييض لأن بينتج عنها غازات سامة.

3- ما تحطش المنظفات في أي حاجة غير الأزازير والأوعية بتاعتها عشان ماحدش يغلط ويستخدمها لأي غرض تاني، خصوصًا لو فيه أطفال في البيت.

4- ابعد تمامًا بأي منظفات عن الأكل أو أي مواد غذائية متخزنة أو موجودة في البيت.

5- ما تستهترش بقراية التعليمات اللي على كل منتج، خصوصًا في فترة زي دي بتستخدم فيها المنظفات أكتر من الطبيعي.

6- لما ترمي أي منظفات أو مبيدات أو مواد كيميائية بشكل عام عشان صلاحيتها انتهت أو عشان مش عايزها لأي سبب لازم تخلي بالك من طريقة التخلص منها وإنها مش هتمر على إيد أطفال أو أشخاص غير مؤهلة.

ودي شوية مواد ما ينفعش تخلطهم على بعض أبدًا:

1- الكحول مع  الكلور المبيض لأنه ينتج كلوروفورم

2- الكلور مع الخل لأنه سيتم إطلاق غاز الكلور سام

3- الكلور المبيض مع المنظفات اللي فيها أمونيا لأنه هينتج أبخرة الكلورامين السامة.

4- بيروكسيد الهيدروجين مع الخل لأنه ينتج حمض الباريكتيك

5-صودا الخبز مع الخل لأنه هينتج محلول للتنظيف غير فعال على الإطلاق ولا فائدة منه.

الموضوع خطير ويستحق اهتمامك ولو فيه أي مادة مش عارف بتكون موجودة فإيه يبقى لازم ترجع للإرشادات والمكونات على علبة أي منتج، ولو المنتج ما عليهوش إرشادات مش محتاج نقولك إن ده خطر!


 

Comments: