قايمة بأفلام قصيرة مناسبة للباقة تسلي نفسك بيها في الحجر الصحي

26/03/2020

على قد ما الفترة دي من أغرب الفترات اللي ممكن تعيشها في حياتك بسبب الحجر الصحي وقعدة البيت إلا إنك ممكن تستغلها وتتفرج على الأفلام والمسلسلات اللي نفسك تشوفها بقالك فترة، لكن احنا وإنت عارفين إن النت اليومين دول بقى بعافية أكتر من الفترة اللي فاتت خصوصا في الفترة بتاعت بليل مع بداية قعدة الناس في البيت.

وفي الحالات دي بيبقى الأفضل إنك تدور على حاجات تستهلك نت أقل تسلي نفسك فيها، زي إنك تقرى أو تسمع حاجة أو حتى تتفرج على أفلام بس تكون أفلام قصيرة.، فهنحاول نساعدك شوية ونقولك الحاجات اللي تسليك بإنترنت ضعيف أو تبقى مناسبة لباقة نت.

دي قايمة ببعض الأفلام القصيرة اللي ممكن تسلي نفسك فيها الفترة دي:

1- فيلم "Blind Vaysha"

الفيلم بيحكي عن قصة بنت ممكن تشوف الماضي والمستقبل في نفس الوقت كل زمن منهم بعين بس مابتقدرش تشوف الحاضر، ومدة الفيلم 8 دقايق 

2- فيلم "Borrowed Time"

الفيلم بيحكي عن قصة شخص عدى بحادثة سيئة وبيحاول ينساها، ومع كل خطوة بياخدها لقدام عشان ينسى بيفتكر الذكريات أكتر، ولازم يلاقي القوة عشان يكمل، مدة الفيلم 7 دقايق.

3- فيلم "Pearl":

الفيلم بيحكي عن قصة ممرضة في واحدة من المستشفيات اللي بتلاقي حب عمرها بعد 20 سنة وبيكون مصاب بالسرطان، مدة الفيلم 16 دقيقة.

4- فيلم "Piper"

قصة الفيلم عن عصفورة بتعلم ابنها إنه يلاقي الأكل بنفسه، وأثناء العملية دي بتواجه مشكلة كبيرة بيبقى لازم تتغلب عليها، مدة الفيلم 6 دقايق.

5- فيلم " The Bigger Picture":

قصة الفيلم بتدور عن أخين بيكافحوا عشان يخلوا  بالهم من نفسهم بعد ما أمهم العجوزة ماتت، مدة الفيلم 8 دقايق.

6- فيلم "The Dam Keeper":

الفيلم بيحكي عن قصة خنزير صغير بيحاول يحافظ على البلد بتاعته من تلوث الهوا لكن الناس بتنكر جميله وبيتم التنمر عليه في المدرسة، ولما فرد جديد بيجي المدرسة الأمور بتتغير، مدة الفيلم 18 دقيقة.

7- فيلم "A Single Life":

قصة الفيلم بتتكلم عن بنت اسمها "Pia" وهي بتلعب مزيكا اكتشفت طريقة للسفر بالزمن، مدة الفيلم 3 دقايق.

8- فيلم "Negative Space"

هو فيلم بيتكلم عن علاقة الأب بإبنه ومدة الفيلم 5 دقايق ونص.

9- فيلم "Lost & Found":

قصة الفيلم بتحكي عن ديناصور لعبة مصنوع من التريكو، بيكشف نفسه تماماً إنه ينقذ حب عمره

10- فيلم "المنور":

فيلم بطولة أمينة خليل ومحمد خان، بيتكلم عن قصة بنت نفسها تخلف، مدة الفيلم 18 دقيقة.

11- فيلم "الأسم أنثى":

الفيلم بيحكي عن المشاكل اللي الستات بتواجها في المجتمع الشرقي زي تحكمات الرجالة فيها، مدة الفيلم 10 دقايق.

12- فيلم "صباح الفل":

الفيلم بطولة هند صبري بيحكي عن حياة يومية لست مصرية بتشتغل ومخلفة، الفيلم مدته 8 دقايق ونص.

- ده غير إنك ممكن تتعرف على أفلام قصيرة عالمية أكتر من هنا 

- وممكن تعرف وتشوف أفلام قصيرة مصرية على اليوتيوب من هنا

Comments: